A.C.D. VAL BADIA - A.C.D. VAL BADIA - der Fußball im Gadertal

Dumënia, ai 29 de mà 2011

Spazirada di campiuns dla Val Badia tl derby cuntra le Mareo

La scuadra dla Val Badia che á bele n'ultima domënia davagné le campionat de 3a. Categoria 2010/11 tl grup “C” á inće davagné valgamia saurí le derby cuntra le Mareo. La formaziun campionëssa de Luca Massa é stada buna da davagné düć cater i derbys de chësc campionat, nia mal. Cun sis punc de vantaje sön i secundi él gnü stüt jö chësc campionat da primat che á porté tlá 2°. Categoria.

L'“idea” ACD Val Badia che á metü adöm les scuadres dl Alta Badia y San Martin de Tor sa fat avarëi y sa fat crëta che en doman podará magari inće anuzé val atra scuadra dla valada ??? Complimenć á düć. La partida é stada śogada sot en bel gran sorëdl, cun gran sportivité cun ma dui amonis, un por pert. S.Felder dla Val Badia y R.Mutschlechner dl Mareo, por la cronaca! N bel publich da n trames les perts á fat da cornisc, inće dô la partida. Sön le „tifo“ sa val marou lascé sö che chi dla “Val Badia” ćianta y scraia ma por talian, chiló podes nüsc “fans” se fá val ponsier.
Al 14^ menüt sëgna bele la Val Badia, na bela aziun da man ćiampa jö vëgn portada inant da Alfreider cun na lungia passada t'aria dl Mareo. Chiló marché ala “buna” él O. Clara che tira al jore tl piz plú dalunc de Moling śignan en gran bel gol. Al 18^ menüt por n fal de Felder sön M.Mutschlechner püch dan le limit dl aria ćiafa le Mareo na puniziun. La trata de “Cuba” Rajca roda dô le mür di defensurs ite cuntra pé de porta, chiló robat cun na bela parada Michl Moling demez le gran prigo. Do da 34^ de jüch toma le 0 a 2, n'aziun da mesaciamp jö ti fej rové le palê a Stampfer dan le limit. Chësc tira te porta na bela trata alta che arsësc te porta. Al passa ma en menüt i al toma bela le 0 a 3, indo Stampfer tira n gran striscun te porta. Le verdaporta dl Mareo é bun da robate la trata cuntra le limit dl aria, chiló röia á dalerch cun slöm Pescollderung che antizipëia düc i defensurs tiran da sú te porta. “Matti” Stampfer se fej chiló na destrata y mëss lascé le jüch.  
Tl mët man dl secundo tëmp toi le Mareo le jüch tles mans. Al 50^ menüt él Winkler che röia t'aria ala trata dan Moling, chësc deviëa te ćiantun. Do da 53^ de jüch passa Rajca á mesa aria dla Val Badia por M. Mutschlechner che cun val finta é bun da scampé sú cuntra porta danter Vittur y Felder i cun na trata á mesa altëza sön na pert dl portier śëgnel le gol. Al 67ejim él na gran aziun de Pescollderung che röia da na pert ite t'aria, á mez él sú O. Clara che tira sö dales stëres impede te porta, paziënza. Do da 76^ menüc á indo Marco “Mutsch” na buna ocajiun, al é bun t'aria da antizipé le sterch defensur Vittur y da trá te porta. Le un dla Val Badia blochëia ia por tera. Trëi menüc plü tert röia le 1 a 4. Le defensur Bernardi se porta dant y al ćiafa bun vint metri dan porta le curan che al tira te porta cun na gran trata, ci bel gol sot la stangia ite. Al 85^ menüt se lascia sö chi dla Val Badia pró le arbiter por en fal t'aria de Complojer sön “Turbo” Alfreider. Mo le resultat ne é nia al prigo. La “cherscia” sön le turta sciöche an dij, la mët Armin Erlacher al 91^ de jüch. Al ciafa le palê sú dan la gran aria y al fej na bela gran trata che arscësc sot la stangia de porta ite olache le portier J.Moling ne pó nia rové,1 a 5. Gran ligrëza y i complimënc da pert di śogadus dl Mareo (inće fać tla “Usc”) á sambëgn fat sportiv plajëi. Le cronist dal “Ciamau” da Al Plan Renato Paratscha.

SC  Mareo  –  ACD  Val  Badia/Raiffeisen:  1 – 5

Formaziun ACD Val Badia: 1.Michael Moling, 2.Stefan Felder (dal 61^ Julian Bernardi), 3.Florian Barbolini (dal 58^ Matthias Thaler), 4.Simon Dapoz (capitan), 5.Samuel Vittur, 6.Paolo Adami, 7.Elmar Erlacher (dal 56^ Andrea Irsara), 8.Matthias Stampfer (dal 37^ Armin Erlacher), 9.Oskar Clara (dal 70^ Manuel Clara), 10.Manuel Pescollderung, 11.Roland Alfreider.

Alenadù:   Luca Massa.

Formaziun SC Mareo: 1.Julian Moling, 2.Thomas Ploner (dal 77^ Daniel Agreiter), 3.Andrea Mutschlechner, 4.Patrick Complojer, 5.Walter Pisching (dal 62^ David Mutschlechner), 6.Alfons Facchini, 7.Paul Pisching (dal 70^ Filip Ploner), 8.Daniel Tamers (dal 46^ Samuel Winkler) (dal 83^ Philipp Lanthaler), 9.Marco Mutschlechner (capitan), 10.Robert Mutschlechner, 11 Jakub Rajca.

Alenadù:   Markus Winkler.

Goi dl derby:  14^ Oskar Clara (VB), 34^ Matthias Stampfer (VB), 35^ Manuel Pescollderung (VB), 53^ Marco Mutschlechner (Mareo), 79^ Julian Bernardi (VB), 91^ Armin Erlacher (VB).