Dumënia, ai 22 de mà 2011
La scuadra dl ACD Val Badia jora te 2a. Categoria, campiuns, campiuns, campiuns
Na partida dan la fin dl campionat é "la matematica" che ti da rajun al "ACD Val Badia" che davagna le campionat de 3a. categoria 2010/11 grupa "C". Campiuns. La novité tl jüch al palê tla valada é la Val Badia é chesta "vagada" metöda adöm da dös dles cinch scuadres dla Val Badia á porté le gran früt dla promoziun tla 2a. categoria.
Dô la pordöda cuntra le Lijun é la partida cuntra le sterch Wiesen la gran ocajiun por abiné i punc por la sicureza dl pröm post. I ghesc á ince cun n bun resultat cuntra la Val Badia la poscibilité por le secundo post. Le Wiesen pó ince mostré sö le miú atach dla grupa cun begn 53 goi signà, dal atra pert la miú defensciun
de döta la 3a. categoria de Südtirol cun ma tredesc goi ciafà. Dan n'ultima n él gnü fora en 0 a 0, che á pité ince da trames les perts ocajiuns da gol y emoziuns. N'resultat che acontenta n trami, cun le medemo resultat se röia ince la partida dl San Laorenz y chesc o dí che an resta pröms incina la fin.
Atira metel man da plövei dassen. Al 8^ menüt tira Elmar Erlacher n'ciantun te porta, cun i pügns devieia fora le prigo le un dl Wiesen. Do da 14^ de jüch él n bel colp de ce de Stampfer te porta, le portier devieia da na pert fora. Ma n' menüt dedo él na gran aziun de Clara t'aria, chesc passa a Stampfer che tira da daimpró te porta. Le un Larch fej na gran parada devian te ciantun. Al 17^ menüt röia da man ciampa ite t'aria le sterch atacant V.Hofer, cun n gran recuper Adami de piet ti devieiel le palê sön la rei defora de porta. Do da 28^ de jüch él n slalom de "Peuisc" Clara danter i defensurs dl Wiesen, püch dan pe'de porta é ciamò bun n defensur da tra demez.
Tl secundo temp vegnl fora n bel gran cialdun sura la palza da La Ila. Al 55^ menüt él n gran intervent de Massa cun la man dan a n'atacant dl Wiesen che vegn anticipé. "Luca" se ciafa ince n bot. Do da 62^ menüc passa dan porta Stampfer n curan che trami i "Manuel" ne da buna posiziun nia bugn da devié te porta. Al 80^ de jüch röia Clara sú t'aria, impede trá passel a Pescollderung che tira. La trata vegn rebatöda da na pert fora. Ti ultimi menüc se fej sintí le sterch atach dl Wiesen. Al 85^ menüt se ciafa adoss Vittur le palê sön n brac t'aria, mo an nê degöna volonarieté y al ne vegn gnanca protesté. N menüt plü tert á ciamò i ghesc na buna ocajiun cun na trata dl diesc Frick che röia nia de tröp dlungia le pé de porta fora sön la man ciampa de Massa. Al 91^ y 94^ él ince i pröms amonis, trami dl Wiesen por fai de jüch, bun le arbiter A. Crepaz.
Dedo la festa dla promoziun, cun n "Luca Massa" en legrimes por la gran emoziun. Complimenc á düc´: dal alenadù "Luca", ai ´sogadus, al consei dl ACD y ai tröc, tröc tifosi da döta la Val Badia. A se odei a Al Plan por le derby.
ACD Val Badia - SV Wiesen: 0 - 0
Formaziun dla Val Badia: 1.Luca Massa, 2.Julian Bernardi, 3.Stefan Felder, 4.Simon Dapoz (capitan), 5.Samuel Vittur; 6.Paolo Adami, 7.Elmar Erlacher (dal 63^ Matthias Thaler), 8.Matthias Stampfer (dal 75^ Andrea Irsara), 9.Manuel Clara (dal 84^ Christian Alfreider), 10.Armin Erlacher (dal 78^ Roland Alfreider), 1.Manuel Pescollderung.
Alenadù: Luca Massa
Proscima partida: en domenia, ai 29 de mà 2011 dales 16.00 sön la plaza dl palê da Al Plan por le derby cuntra le SC Mareo.