Dumënia, ai 02 de mà 2011
Le "13" porta bun, importanta deventa cuntra i bugn secundi dl San Laorenz y plú cater punc de vantaje te tlassament
I tröc´ fans dla Val Badia sa prejenté cun na bela nöia sciarpa
Le tröp publich rové adalerch, la gran pert é ladins da tröc paisc dla Val Badia á odü na bela partida al palê. Cun n jüch asvelt da trames les perts y la sodesfaziun dla "13" deventa sön dejedöt partides sogades. Öna de gran valüta, cuntra i pröms che gno dô te tlassament y che pó mostré sö deplü sogadus de val categories plü altes.
L' alenadù dla Val Badia Luca Massa á indo salpü da mete te ciamp la derta formaziun, chera plü adatada por fá resultat plegn. Al 2^ menüt röia na passada apena te aria a Stampfer, chesc marché lerch tira alt cuntra Plan de Corones. Do da 8^ de jüch vegn na trata te aria de "Matti" Stampfer rebatöda da n defensur y röia a Trebo a mez aria. Chesc tira te porta y le un puster para ia por tera. Al 17^ menüt él n pass luch cuntra la gran aria dl San Laorenz por Pescollderung, chesc cun gran velocité ti dá metri al defensur D.Gasser y röia dan porta. Le verdaporta Kosta vegn fora á dincuntra y "Manuel" ti roda le palê do ia te porta öta por le 0 a 1. N gol posoch. Propi segn se doura na neora sura le ciamp, sogadus y fans se ciafa ne bela lavada.
La reaziun dl San Laorenz é atira dan man, al 23^ de jüch mess gní fora Massa sön i pisc de W.Huber rové prigorus t' aria por ti tó le curan. Do da 28^ menüc do na bela aziun asvelta cun na trata da dan aria tocha le set K. Erlacher la pert alta dla stangia de porta. Al 39^ de jüch met en moviment Thaler le atacant Trebo püch dan aria, "Gionni" plü svelto che le defensur sciapa cuntra porta. Le portier vegn fora y Trebo tira cuntra porta oramai öta, le palê röia de püch dlugia pe bass fora. Un n menüt dedo él indo n'aziun prigorosa di pustri, cun na trata bassa dlugia pe de porta fora dl nü S.Gasser. Al 44^ de jüch á indo Trebo le palê por le 0 a 2 sön i pîsc. Mo al moment dla trata dan le portier ciumpedel y le palê coghera bel plan dlungia porta fora. Do da 44^ menüc röia t'aria do na bela aziun K.Erlacher bel sú, al lascia pié ia na bela trata sön le pé lunch. Le portier ladin á na gran reaziun y cun la man ciampa devieiel te ciantun le prigo. Al se röia insciö le pröm temp, cun n bel jüch y tröpes aziuns prigoroses da trames les perts.
Al 56^ menüt él n bur fal dan porta cun n bot sön le üf a Massa da pert dl nü S.Gasser, amonì. Mo dô le spavent é "Luca" bun da soghè inant. Al 83^ menüt él na puniziun de Agreiter da dalunc te porta, te dui temps devieia demez cun la man Massa dan le prigorus c'de n'atacant. Dui menüc dedo röia sú Pescollderung ala trata te porta, le un puster la devieia te ciantun. Al 90^ de jüch él na evidenta passada de revers al portier Kosta che vegn da chesc tuta sö, chiló esel messü gní de na punziun ai ladins t' aria. Le arbiter Broggi ne sciüra nia, mo senza él sté un di mius te ciamp.
Segn pon se gode la bela deventa incina la proscima partida. Chesta é le derby cuntra La Val, scuadra de döt respet che ne á mai ciamò pordü tl rode da d'aiscöda y tol ince pert ala semifinala dla "Copa Provinzia 2010/11".
ASD San Laorenz - ACD Val Badia: 0 - 1
Formaziun ACD Val Badia: 1.Luca Massa, 2.Davide Moling (dal 69^ Florian Barbolini), 3.Julian Bernardi, 4.Simon Dapoz (capitan), 5.Samuel Vittur, 6.Paolo Adami, 7.Matthias Thaler (dal 85^ Elmar Erlacher), 8.Matthias Stampfer, 9.Giuvani Trebo (dal 73^ Roland Alfreider), 10.Armin Erlacher, 11.Manuel Pescollderung.
Alenadù: Luca Massa.
Gol por la Val Badia: 17^ Manuel Pescollderung
Proscima partida: En domenia, ai 8 de mà 2011 dales 16.00 sön la plaza dl palê da La Ila, le derby cuntra Us La Val.
3. Amateurliga 2023/2024