Dumënia, ai 17 de aurì 2011
Inant pröms do la bela partida cuntra le Raas che á soghè para incina la fin
Le San Laorenz tegn bot y te dös partides era tan inant da soghè cuntra i pustri
Sön la plaza da La Ila te n' domisdé bel cialt él stè da odei na bela partida. Le bel jüch é stè scialdi da odei da pert dla formaziun de ciasa, le Raas á pro le atach süa miú erma. Ai po mostré sö le secundo miu atach dl grup "C" de 3a. categoria.
Porchel á ince le portier-alenadù Luca Massa albü da descmostré döta süa bravöra cun deplü de bunes parades. La scuadra dl San Laorenz cun n punt demanco tegn bot, le distach dai terzi é segn de begn nü punc. La partida dl pröm de mà cuntra i pustri sará bele na sort de decijiun por le pröm y secundo post final.
Bele al 11^ menüt segna "Turbo" Alfreider ciafan n palê dan porta, mo le arbiter anuleia por na posiziun fora dl jüch dl medemo. Al á odü bun. N menüt dedo vêl le gol, al röia t 'aria da na pert ite M. Clara do na bela aziun corala. Süa trata vegn rebatöda dal portier y sön le curan röia Thaler che tira te porta cun le portier ia por tera por le 1 a 0. Al 28^ menüt tira le Raas na puniziun da magari caranta metri cuntra porta ladina. Le palê arsesc sön la pert alta dla stangia de porta. Do da 37^ de jüch röia t´aria sú dan le un Oberhauser Alfreider che se fej robate la trata da daimpró. Al 42^ menüt antizipeia te ciantun Adami sön le önesc Delazer rové dan porta. La trata da ciantun vegn deviada te porta de ce dal set Cassius y bel blocada ia por tera da Massa. Al 45^ de jüch ciafa la Val Badia na puniziun dan le limit, Erlacher la tira sura le mür ite. Le defensur sis Tauber tl mür la alza de ce y chesta röia te porta sot stangia ite por le 2 a 0.
Al 54^ menüt él na trata dl sú Clara te porta, le verdaporta cun la man alza le cura sura stangia fora. Sön la trata da ciantun abina le dui S.Überbacher le palê cun la man, l´önescmetri vegn conzedü. La trata vegn surandada al spezialist "Matti" Stampfer. La secia trata é sön la man ciampa dl portier che sa bel sciuré sön chesta pert n pü massa tert, segn stara sön le 3 a 0. Trei menüc plü tert á ince le Raas na gran ocajiun. Na deviaziun de ce dl sterch set Cassius da daimpró vegn rebatöda dan porta da Massa. Do da 60^ de jüch ti robat le bun un cun le pé na trata da püc metri a Trebo. Al 63^ do na bela aziun cun palê bass ti röia t´aria na passada a Manuel Clara che supereia n´ velozité le defensur y met le curan te porta por le 4 a 0. Al 73^ menüt á Thaler y Oskar Clara dös gran ocajiuns indolater, le portier se salva cun bravöra. Do da 86^ menüc´ röia le gol dla bandira dl Raas, la defensciun ladina cunzed impü tröp ai atacanc che ne pa nia mal. Da na pert sön n rembalz pert "Kaka" Vittur le palê che vegn passé dan aria al set Cassius che lascia pié ia na bela tra sön le secundo pé de porta a mesa alteza, n bel gol. Chiló se dessena nia püch Massa cun i sü. Dui menüc plü tert ciafa le Raas na puniziun da le limit, ara vegn trat bassa do mür ite cun Massa che la tegn sö püch dan le pe´de porta. Le resultat resta sön le 4 a 1, ince sce an es podü odei da trames les perts deplü goi. La Val Badia resta inant pröma. N´ begngnü te scuadra á Stefan Felder che á fat inchö süa pröma presenza tla Val Badia.
ACD Val Badia - ASV Raas: 4 - 1
Formaziun ACD Val Badia: 1.Luca Massa, 2.Davide Moling (dal 46^ Devis Vittur), 3.Julian Bernardi, 4.Simon Dapoz (capitan). 5.Samuel Vittur, 6.Paolo Adami (dal 78^ Stefan Felder), 7.Matthias Thaler, 8.Matthias Stampfer (dal 84^ Manuel Pescollderung), 9.Manuel Clara (dal 69^ Oskar Clara), 10.Armin Erlacher, 11.Roland Alfreider (dal 58^ Giuvani Trebo).
Alenadù: Luca Massa.
Goi por la Val Badia: 12^ Matthias Thaler, 45^ Armin Erlacher, 54^ Matthias Stampfer sön önescmetri, 63^ Manuel Clara.
Proscima partida: en doman sabeda Santa, ai 23 d' aurì 2011 dales 16.00 sön la plaza sintetica da Pichl Gsies cuntre le ASC Gsiesertal.
3. Amateurliga 2023/2024