Dumënia, ai 03 de otober 2010
N gröm de gran ocajiuns sciurades al vent y dui iadi castiá dai aversars. Da n'ultima n'bun punt portè á ciasa
Ala fin pon ester contenc cun n punt porté à ciasa y de avei lascè le Raas do te tlassament cun dui punc demanco. La scuadra dla Val Badia à fat n gran druch tl pröm temp sogan fora set gran ocajiun da gol. Ala pröma dejatenziun le Raas jü n vantaje. La regola dl jüch al palê, chi che fala paia. Tl secundo temp él gnü soghè püch, tröc fai y suadöt chi de ciasa pro vigni ocajiun fajô scena restan dî ia por tera. Ince le arbiter Merante na nia albü la partida tles mans y te n per de ocajiuns al penalisé i ladins.
Al 3^ menüt tira Moling na puniziun t' aria, le curan röia al nü Alfreider che tira de püch dlungia pè de porta fora. Al 8^ de jüch röia n pass da na pert dl' aria a Pescollderung che salta cun sclöm i defensurs y tira cuntra le pè lunch. De n nia fora. Do da 13^ menüc tla pröma trata dl Raas, le gol. Da bun vintecinch metri ciafa bel sù Wachtler le palê che al tira cun n striscun te porta. Chesc röia bass dlungia pé de porta ite senza che le paradù ladin pois parè.
Dui dedo él na trata da trenta metri de Moling che röia sot la stangia. Cun n gran intervent devieia Huber, le verdaporta dl Raas te ciantun. Al 22^ de jüch röia le atacant Cassius lascè su ala trata cuntra porta de Massa, ara röia de püch dlungia le pé bass fora. Do na bela aziun passa Armin Erlacher da aria fora le curan a Stampfer che lascia pié ia na bela trata che röia rodunta te porta. 1 a 1 al 27^ menüt, der merité. Al 36^ menüt röia le palê a Pescollderung da Elmar Erlacher, süa trata vegn rebatöda cun na gran parada dal portier. Do da 45^ de jüch gran desfortüna por la Val Badia, bel sú tira Pescollderung te porta do avei soghè fora le portier, la trata atoca le pé de porta.
Al 55^ menüt se porta indo le Raas dant de n gol. Da na trata da ciantun fej i raaseri n pice schema che ne vegn nia contrastè dai defensurs ladins. Le curan röia a Wachtler che tira te porta por le 2 a 1. Ma n menüt dedo podes le arbiter tó na decijiun, o dös por i ladins. A mesaciamp vegnel fat n bur fal sön Stampfer nia sciuré, tres tla medema aziun röia t' aria Pescollderung che vegn fat tomè cun na evidenta sburla. Trami i fai ne vegn nia sciurá. Al 63^ de jüch va ite te n contrast cun decijiun le capitan Dapoz, chel dl Raas fej gran pode, secunda ghela y desgorta por le capitan dla Val Badia. Al 77^ menüt röia na passada de Clara dan porta a "Turbo" Alfreider bel sú che arjoma la deviaziun. Dal 80^ menüt resta ince le Raas n diesc, t' aria toma ia le cater A.Tauber do che al é passé dan ia Clara.
Spostament d'aria o ater, secunda ghela por simulaziun. Chesc à ince na reaziun cuntra le arbiter, tignida jö dai compagns de scuadra. Al 89^ menüt röia le merité 2 a 2. Le curan röia a "Chito" Alfreider che le süga inant por Manuel Clara t' aria, chesc é bun na superé la defensciun y signé. Protestes da pert dl Raas sön na posiziun de fora dal jüch, mo i pröms a scuté messas ester bel vei por ci che ne nia gnü scuré cuntra de vei.
ASV Raas - ACD Val Badia/Raiffeisen: 2 - 2
Formaziun Val Badia: 1.Luca Massa, 2.Davide Moling II (dal 71^ Alex Stampfer), 3.Devis Vittur, 4.Simon Dapoz (capitan), 5.Samuel Vittur (dal 85^ Andreas Chizzali), 6.Paolo Adami, 7.Elmar Erlacher, 8.Matthias Stampfer (dal 59^ Manuel Clara), 9.Roland Alfreider (dal 78^ Christian Alfreider), 10.Armin Erlacher, 11.Manuel Pescollderung.
Alenadù: Luca Massa
Goi por la Val Badia: 27^ Matthias Stampfer, 89^ Manuel Clara.
Proscima partida: en doman domenia ai 10 de otober dales 15.30 sön la plaza "Pradel" a San Martin cuntra le SC Gsiesertal.
3. Amateurliga 2023/2024