ACD Val Badia - ASV Latzfons B

Sabda, 02. mà 2026

La Val Badia é te n bun moment, ara davagna te ciasa y röia só al setim post te tlassament.

Al é sté na partida sogada sot n gran cialt, al é ince gnú fat les palses por podei bere. La jona arbitra à arbitré bun. Ti pröms carantecinch menüc à la Val Badia en pú stenté sbalian tröpes passades y lascian deplú ocajiuns ai ghesc. Tro damí él gnú le jüch tl secundo temp cun ocajiuns y le gol dla deventa. I alenadus à indô messú chambié de tröp la formaziun por les tröpes desvalies assenzes. Dô avei subí le gol à la formaziun de Castlunger y Costabiei albú na buna reaziun rodan le resultat da süa pert. Cun chisc trei punc röia só la VB al setim post te tlassament, jon dant propi al Latzfons "B".

Al 25' menüt él na dopla trata di atacanc dl Latzfons "B", sön trames robat Ferdigg, la secunda te ciantun. Dô da 36' de jüch sön en palé lunch él n fâl de posiziun dla defensciun ladina. Le atacant röia bel sú dan le portir, mó al se archirta sciöche strine da Ferdigg che sé peia le curan. Al 37ejim toma le 0 a 1 por i ghesc. Sön na trata da ciantun él na bela rebatöda dl capitan ladin. Sön le palé röia i atacanc, un fej na finta ti lascian la trata da compagn che vegn da dô chá y tira te porta. Al 41' menüt él na passada lungia de Sintoni por Valentini bel dan le portir, en defensur é bun da trá demez la palé denant che le diesc dla VB tires te porta. Dô da 42' de jüch tira Clara na trata da ciantun che Sintoni "Lele" abina sön le punt di önescmetri y de ciamp tira rodunt te porta por le 1 a 1.
Tl mete man dl secundo temp él dös trates de Valentini da fora dla gran aria, en trames parades dal un P. Steiner. Al 76ejim röia t' aria Valentini y tira á doss al verdaporta. Chesc né tegn nia le curan che röia indô al diesc ladin che tira bass lunch te porta por le 2 a 1. I ghesc prô begn ciamò da druché, mó la VB se defen bun tignin le resultat cina le scüre dla fin. Chí da Lazfons "B" é ma cuntá de önesc y ná niacha podú chambié en sú sogadù. Cun n té cialt val sogadù "fresch" es desigú podú daidé. Bun por la VB che pó se gode la deventa y la miú posiziun te tlassamnet. Má inant ensció.

ACD Val Badia - ASV Latzfons B: 2 - 1

Formaziun ACD Val Badia: 1.Rene Ferdigg (capitan), 2.Joel Unterweger, 3.Tobias Fistill (dal 70' Andre Costner), 4.Max Videsott, 5.Simon Graffonara, 6.Simone Dallapiazza (dal 89' Luca Crepaz), 7.Emanuele Sintoni, 8.Fabian Clara, 9.Marc Mayr (dal 62' Riccardo Perrucchietti), 10.Luca Valentini, 11.Luca Bernardi (dal 46' Alex Miribung).

Alenadus: Albert Castlunger y Patrick Costabiei.

Goi por la Val Badia: 42' Emanuele Sintoni, 76' Luca Valentini.

Proscima partida: en sabeda ai 9 de má dales 15:30 sön la plaza da Percha cuntra le Percha.