ACD Val Badia - OSG 3 Zinnen II

Sabda, 18. aurì 2026

Na gran devënta cuntra n aversar che á combatü cina ala fin.

La pröma partida sogada d’aisciöda a San Martin porta trëi punc dër importanc por le tlassamënt, cuntra na scuadra che á porvé cina ala fin da cambié l resultat.

La partida é gnüda sogada te n bun cialt tl ciamp "Pradel" a San Martin. I ladins röva dër bun ite te partida y prô atira da chirí le gol dl vantaje cuntra l’aversar dl’Alta Val de Puster. Dô da 10 menüc é Emanuele Sintoni che fej la pröma trata, mo ara vá püch sura porta fora. I aversars conzed tröpes bunes ocajiuns por la formaziun de ciasa, che é spó buna da ciafé l gol dl vantaje dô da 20 menüc de jüch: na trata te area da pert de Luca Valentini röva söi pisc a Lukas Pramstaller che oj le pale te porta por le 1 a 0. I ladins prô ince dô l gol da fá presciun ai pustri, naota cun na trata de Simone Dalla Piazza, y spó cun na trata de Luca Valentini, olache le portier aversar para cun n gran intervënt. Insciö se röva le pröm tëmp, i ladins é stá bugn da se defëne dër bun sënza conzede ocajiuns prigoroses ai aversars, y ess ince albü valgönes ocajiuns por fá l secundo gol.
La partida cambia daldöt tl secundo tëmp, an vëiga da atira che i aversars ne é nia cuntënc y vá te ciamp cun na gran convinziun de podëi cambié le resultat. Al 53’ menüt prô l puster Klammer na trata da 35 metri, le pale atoca la stangia y ne vá, por fortüna di ladins, nia te porta. 2 menüc dedô é Joel Unterweger che deviëia le pale zoruch al 1 Ferdigg che tol sö cun les mans la cogora, i aversars protestëia por n passaje zoruch, emo la direturia de gara fej soghé inant. I pustri ne lascia nia dô, y chir te vigni manira l gol dla parité, mo la defenjiun ladina se para cun döt ciche ai pó. L’ultima aziun dla partida é chëra plü priogorosa di pustri: sön na puniziun dan area é l’aversar puster Juan Cruz che atoca la stangia, dô che la cogora é gnüda azicada dal portier ladin Ferdigg. Dô da set menüc de recuper dër patis por la formaziun de ciasa se röva la partida sön le resultat de 1 a 0. Al é sté na partida dër combatüda cina al’ultim menüt, olache i ladins á desmustré de avëi na gran determinaziun da porté a ciasa de bugn resultac. Cun chisc trëi punc é la Val Badia sëgn al setim post te tlassamënt cun 20 punc.

ACD Val Badia - OSG 3 Zinnen II: 1 - 0

Formaziun VB: 1. Rene Ferdigg, 2. Joel Unterweger, 3. Matteo Ploner, 4. Max Videsott, 5. Simon Graffonara, 6. Simone Dalla Piazza, 7. Emanuele Sintoni, 8. Fabian Clara (dal 80’ Alexander Ploner), 9. Lukas Pramstaller (dal 65’ David Pizzinini), 10. Luca Valentini (dal 84’ Luca Bernardi) 11. Tobias Fistill (dal 70’ Lois Costner).

Proscima partida: sabeda ai 25 de aurí dales 16:30 a Rasen cuntra Rasen/Antholz.