ASV Latzfons B - ACD Val Badia

Vëindres, 10. otober 2025

Na burta prestaziun fora de ciasa cuntra le Latzfons Verdings B.

En chësc iade ne é la defenjiun dla Val Badia nia buna da tigní la porta nëta y se ciafa 3 goi cuntra le Latzfons Verdings B. La partida é gnüda sogada le vëindres sëra a Latzfons, magari ince porche i aversars podô se tó valgügn sogadus dala pröma scuadra.

La formaziun ladina röva atira bun tla partida y á bel dô da 6 menüc na buna ocajiun: sön na trata dal ciantun ne é degügn bugn da trá demez le palé, Simone Dallapiazza l’abina, mo tira alt sura porta fora. Mâ dui menüc dedô toma a sorpresa le 1 a 0 por i aversars. Dlungia l’area é n sogadú ladin che perd le palé, al röva te area söl secundo palo olache l’aversar pó tra bel su te porta. Dô le pröm gol ne suzedel cina al 27’ menüt: sön na puniziun da bëgn 30 metri dala porta aversaria é Fabian Clara che atoca la stangia de porta y ne fej pur püch nia le gol dl per. Insciö röva le pröm tëmp cun püces aziuns priguroses da trames les perts.
Tl secundo tëmp vëigun da atira che la Val Badia ó fa presciun ai aversars por chirí le gol, mo sciöche tl pröm tëmp él i aversars che fej le gol dô da püc menüc soga dër bun dai ladins. Indô ne é degügn bugn da trá demez le palé te na posiziun prigurosa dl ciamp, le palé röva dan porta olache i defensurs ladins ne é nia bugn da abiné le palé, n atacant aversar l’abina y porta la partida sön le 2 a 0. Püch dedô á ince i ladins na buna ocajiun, Mattia Kastlunger mët ite n bel cross pur Luca Valentini che tira alt sura porta fora. 10 menüc dedô toma cinamai le terzo gol por i aversars. Le palé röva söi pisc de n aversar che tira da fora de area y fej n gran gol olache le 1 Ferdigg ne pó fá nia. N pêr de menüc dedô á le Latzfons ciamo dër na gran ocajiun da gol, l’atacant aversar pëia ia bel su cuntra porta olache al mëss mâ bate le portier ladin, mo Ferdigg é bun da evité le 4 a 0 cun n bel intervënt. Al 83ejim menüt é spo ince la Val Badia buna da fá n gol. Sön na puniziun püch fora de area él Fabian Clara che se tol la responsabilité da trá, le palé röia sura le mür fora y toma te porta. Na gran bela trata de Clara, che fej so pröm gol te pröma scuadra. Dui menüc dedô ciafa i ladins ciamo na puniziun da plü o manco l’indema posiziun, Clara se arjigna indô ca pur la trata, mo chësc iade é le 1 da Latzfons che abina le palé cun n gran intervënt. Al’ultim menüt dla partida é ince Lukas Pramstaller che se tol la sodisfaziun dl pröm gol te pröma scuadra. Dô n bel cross de Fistill é le jonn atacant ladin bun da sburlé le palé te porta pur le 3 a 2. Atira dô le gol é l’arbiter che sciüra la fin dla partida.
Al é sté na partida olache la Val Badia ess messü aprofité deplü dles ocajiuns da gol ciafades tratan la partida, deperpo é le Latzfons tosc tres sté bun da mëte le palé te porta cun les püces ocajiuns ciafades ti 90 menüc.

ASV Latzfons B - ACD Val Badia: 3 - 2

Formaziun VB: 1. Rene Ferdigg, 2. Joel Unterweger (dal 87’ Luca Bernardi), 3. Mattia Kastlunger, 4. Alex Miribung, 5. Max Videsott, 6. Simone Dallapiazza (dal 62’ Lukas "pres" Pramstaller), 7. Tobias Costalunga (dal 41’ Marc Mayr), 8. Fabian Clara, 9. Simon Clara (dal 57’ Thomas Verginer), 10. Luca Valentini, 11. Emanuele Sintoni (dal 79’ Tobias Fistill).

Proscima partida: Sabeda ai 18 de otober dales 15:30 a La Ila cuntra le Percha.