ACD Val Badia - ASC Rasen

Sabda, 04. otober 2025

Al á falé püch por la deventa, da signè goi né se fejun nia saorí. Mó la VB à la miú defensciun de döt Südtirol tla 3a. Categoria, cun mâ trei goi ciafà.

Sot n cîl curí y acompagné da n pice vent à metú man la partida sön le ciamp "Pradel". À se la soghè fora la formaziun de ciasa cun la miú defensciun, mâ trei goi ciafà y la formaziun pustra cun le miú atach cun dejedot goi signà. Bele da mete man pon oservé che le Rasun é te ciamp cun la numerziun der alta. Por ejempl cun le 17, 18, 20, 55, 91. Cosa che an né veiga nia "gonot" pró i amaturs.

Al 5' menüt él bele dös trates cuntra porta, da impröma de Mayr rebatöda da n defensur y dedô de Fistill ince rebatöda demez. Dô da 44' de jüch sön na crossada t' aria de Sintoni röie le palé cuntra Mayr che vegn anticipé cun i pügns dal numer un puster. Al 51ejim él na passada de S. Clara por Sintoni t' aria che tira te porta, cun dös parades abina le portier puster le palé ia por tera. Cater menüc dedô vegn ince cherdé ala parada le un dla VB. Molling lascia pié ia na trata daimpó che Ferdigg devieiea te ciantun. Al 67' menüt tira Sintoni te porta pass da na pert ite, püch dan la ligna robat en defensur dl Rasun ciamò demez. Al 70ejim sön na bela puniziun de Molling, le dejeset dl R/A jora sön süa pert ciampa Ferdigg devian fora de porta. Na gran parada che salva le 0 a 0. Dô da 83' menüc te na "mia tüa" danter le verdaporta Hochgruber y le defensur Hellweger püch dan aria ti aroba le palé Costalunga che tira te porta öta por le vantaje ladin. Mó nia da crei le arbiter gnú da Treviso só por arbitré anuleia la gol por la posiziun fora dl jüch de Costalunga. Ché nê sambegn nia, da dessené na té decijiun. Gran fortüna por i gesc. N menüt dedô röia da na pert ite t' aria Verginer che vegn afronté da en defensur sech mó ne toma nia jô. Süa trata diagonâla röia fora de porta. Mó sön le fal dl defensur fossl sté bunamneter en önesc metri por la Val Badia. Pazienza, che fej pert dl jüch dl palé. Intant se pon gode le "punt" y an à bele da cater partides nia plú ciafè n gol. Ince chesc n resultat che fêj plajei.

ACD Val Badia - ASC Rasen: 0 - 0

Formaziun ACD Val Badia: 1.Rene Ferdigg (Capitan), 2.Joel Unterweger, 3.Mattia Kastlunger (dal 78' Simon Graffonara), 4.Alex Miribung, 5.Max Videsott, 6.Tobias Fistill (dal 46' Tobias Costalunga), 7.Emanuele Sintoni (dal 94' Stefano Sintoni), 8.Fabian Clara, 9.Marc Mayr (dal 66' Thomas Verginer), 10.Luca Valentini, 11.Simon Clara.

Alenadus: Albert Castlunger y Patrick "Cobra" Costabiei.

Proscima partida: en scnöt vendres ai 10 d' otober da les 20:30 sön la plaza da Latzfons cuntra le Lazfons "B".