OSG 3 Zinnen II - ACD Val Badia

Sabda, 27. setëmber 2025

N punt important cuntra n bun aversar

An savô bel dan partida che l’aversar dl’Alta Val de Puster foss sté rî da bate fora de ciasa, mo la scuadra dla Val Badia á arjigné ca bun la partida y á porté a ciasa n punt.

La partida é gnüda sogada tl ciamp dal palé a Sest, olache an stentâ dasënn da sté inpé sënza i cialzá da 6 tac. Al é sté na partida dër importanta por trames les scuadres, deache chëra dl’Alta Val de Puster ê ma öna na posiziun sura chëra dla Val Badia te tlassamënt y al gnô soghé por se davagné le terzo post provisore te tlassamënt.
La Val Badia röva ite dër bun bel da mët man dla partida y prô atira da fá presciun ala formaziun de ciasa. Al 9’ menüt toma spo le pröm tiro de Kastlunger che vá sura porta fora. Al 20’ menüt él Miribung che é bun da pié ia cun le palé y röia cina dan area di aversars olache al fej pié ia na bela trata, mo le 1 dl’Alta Val de Puster para cun n gran intervënt. Dô da 32 menüc él Sintoni che röia cina te area, al mët ite le palé bass por Mayr che ne le abine por püch nia. Ince Dallapiazza prô da trá sön porta al 38’ menüt: al fej pié ia na buna trata che atoca la stangia de porta y vá fora. Insció röia le pröm tëmp, olache la formaziun dla Val Badia é stada buna da ataché l’aversar y da conzede tosc degöna trata te porta. Tl secundo tëmp é spo la partida che cambia y ince les aziuns dl’Alta Val de Puster mët man da ester priguroses. Bele dô 4 menüc vëgnel na trata da fora dl’area, mo Ferdigg para sigü. Tres deplü é i aversars che fej presciun y la scuadra dla Val Badia mëss se defëne, datrai ince sciüran ia por tera i aversars. Chisc fai á porté a valgönes puniziuns da posiziuns dër priguroses, mo i atacanc aversars ne é nia bugn da aprofité de chëstes ocajiuns. Püch dan la fin dla partida é la formaziun aversaria che á l’ocajiun da gol plü grana dla partida: n atacant dl’Alta Val de Puster tira da na pert ite y atoca la stangia dla porta, le palé röia söi pisc de n’ater aversar puster che pó trá a porta öta sënza portier ciamó ia por tera dala pröma trata, sön chësta é ciamó Kastlunger che slizia dan porta y salva le resultat cun le pe söla linia dla porta. Insciö se röia na partida dër combatüda sön le resultat de 0 a 0.
Cun chësta partida é la formaziun ladina ciamó n iade buna da desmostré che la defenjiun (la miú te campionat cun ma 3 goi ciafá te 5 partides) é metüda sö dër bun y é dër sigüda te ciamp. Ince sce ara ne é nia jüda da jí en vantaje tl pröm tëmp, é ala fin le 0 a 0 sigü le resultat plü dërt por trames les scuadres.

OSG 3 Zinnen II - ACD Val Badia: 0 - 0

Formaziun Val Badia: 1. Ferdigg Rene, 2. Miribung Alex, 3. Kastlunger Mattia, 4. Videsott Max, 5. Graffonara Simon, 6. Dallapiazza Simone, 7. Sintoni Emanuele (dal 84’ Fistill Tobias), 8. Clara Fabian (dal 78’ Verginer Thomas), 9. Mayr Marc (dal 68’ Denicolo Davide), 10. Clara Simon, 11. Valentini Luca.

Alenadus: Castlunger Albert, Costabiei Patrick

Proscima partida: ai 4 de otober dales 15:30 a San Martin de Tor cuntra Rasen-Antholz.