ASV Raas - ACD Val Badia

Domënia, 25. mà 2025

Rové ia le campionat cun na pordöda. Cun chesta deventa der chierida se porta le Raas ai "spareggi" por jí só te 2a. categoria

Che al nê nia na saurida partida sön le pice ciamp da Raas, chel savô bele la Val Badia danfora. Chí de ciasa messâ davagné à vigni moda, speran sön i atri resultac. Ai á ciamò la gran poscibilité da jí sö te 2a. categoria. La Val Badia ti á tigní bot sura döt tl pröm temp. Tl pröm es bindebó dai nerfs, almanco cina che al é rové le gol dl vantje. Tl secundo temp ai aumenté le ritm dl jüch y metú plú sot la VB. Sön val ocajiuns ai ince albú la fortüna sön süa pert.

Al 4' menüt por n fal sön Denicolo ciafa la formaziun ladina na puniziun dan aria. Valentini la tira bel te porta alta, mó le un dl Raas la para sigú. Dô da 14' menüc röia le palé al ot Mair sú dan porta, süa trata vegn rebatöda da Fabian Clara fora püch dan la ligna. Chiló anse albú fortüna. Al 19ejim de jüch röia le 1 a 0 por le Raas. Al é deplú robatödes te aria ladina, sön öna de chestes röia le curan al sú set Hilpold che ná nia dificulté da bate Kastlunger. Na gran ligreza él da aldí pró la scuadra y fora pró le tröp publich. Por na intorta ala ciaidla derta mess al 20' menüt lascé Sintoni la partida. Ala mesora de jüch él na trata prigorosa te porta, dô n ciantun. Kastlunger robat cun i pügn fora de porta. Dô da 42' menüc sön n aziun de atach dla VB röia en toch fora dla gran aria le un Überegger abinan le palé cun la man. Le arbiter scüra na puniziun por i ladins, mó ne tôl degöna atra decijiun cuntra le portier. Na cherta ghela foss stada da dé te chesc cajo. Le banch dla VB protesteia.
Tl 47' ejimo de jüch röia Valentini bel sú te aria dô averi salté só verdian. Al lascia pié ia na trata bassa che vá dlungia pé de porta fora de püch, sön la man derta dl portier. Tl medemo menüt toma le 2 a 0. Le set dl Raas salta ite t' aria y vegn "abracé" da Miribung y toma te aria. Le arbiter scüra en önescmetri y amonesc le sis dla VB. La trata dl cater March é secia y porta indô gran ligreza pró chi de ciasa. Al 61' röia ince le terzo gol dl Raas. Sön na passada lungia röia le nú Michaeler danter i defesurs Plazza y Miribung fora sú dan Kastlunger. Chesc batl cun na trata plazada sön süa gnöda fora. Dô da 76' menüc robata le jon Kastlunger na trata dá daimpró.
Le resutat ne chambia nia plú. In sció se röia chesc campionat cun n penultim post te tlassamnet, mó chesta secunda pert anse soghè impara cun i aversârs. E le grup di jogn é chrescú se fajon na buna esperienza por le proscimo campionat. Chesta é stada l' utlima partida ufiziâla por dös "bandires" dl ACD Val Badia. Olex Stampfer y Florian "Barbo" Barbolini rová en pú ti agn ai tut chesta decijiun. A vei ti vá n gran dilan por só impegn ti agn fat cun dediziun y bun ejempl. E ince de buna "compagnia" dô les partides. Al consei, ai alenadus, ai acompagndus, ai fans y ai sogadus dl ACD VB ti vá l' aodanza de na bela palsa da d' isté.

ASV Raas - ACD Val Badia: 3 - 0

Formaziun ACD Val Badia: 1.Alex Kastlunger, 2.Matteo Ploner (dal 77' Florian Barbolini), 3.Armin Plazza (dal 83' Andrea Pescosta), 4.Simone Dallapiazza, 5.Max Videsott (capitan), 6.Alex Miribung, 7.Fabian Clara, 8.Davide Denicolo (dal 59' Alex Stampfer), 9.Simon Clara (dal 69' Luca Crepaz), 10.Luca Valentini, 11.Emanuele Sintoni (dal 20' Joel Unterweger).

Alenadú: Hanspeter Graffonara.