SSV Mühlwald - ACD Val Badia

Sabda, 15. merz 2025

Na buna prestaziun, nia premiada cun n' punt. La Val Badia sügha bun impara cun i terzi

Sön la plaza da Mühlwald n' él mai saorí da soghè y da fá punc. Chesc san bele por esperienza da plú agn. Mó en chesc iade esera presc garaté da porté à ciasa n punt. La formaziun de Graffonara à tigní bot ala sterscia scuadra dl Mühlwald, bitan jüch y ocajiuns. Ala fin pon ester der contenc dla prestaziun y di complimenc di aversars. Mó i trei punc resta ite à Mühlwald. Feter döta la partida é gnöda sogada sot na lisira plöia. Tröc spetadus dl post à ciarè pró ala partida interesanta.

Al 1' menüt él n cros de Stampfer che röia te aria olache Unterweger spiza de cé inant cuntra le secundo pé de porta. Sön le palê röia Valentini che bel sú devieie te porta por le vantaje dl Acd. Dô da 17' de jüch ciafa la VB na puniziun dan l' aria pustra. Valentini la tira cun savei te porta bassa sön le pröm pé. Le un Knapp jora sön süa man derta devian fora te ciantun. Al 20' menüt toma le 1 a1 cun tröpa desfortüna da pert ladina. Le Mühlwald tira na trata da ciantun, dan le pröm pé él posizione Stampfer che abina sön le pé le curan che sé alza cuntra le secundo pé. Jon sura le un dla VB fora ite te rei. Al 43' de jüch él na trata de n' atacant puster che Ferdigg para dan le pröm pé.
Dô da 48' menüc röia le vantaje dl Mühlwald. Al é n cros dl catordesc te aria püch dan porta, chiló devieia bel le set Volgger de cé te porta dan i defensurs ladins. Al 72ejim toma le 3 a1 por chí de ciasa. Cun na gran trata da dan aria abina le ot Berger der bel le curan che al splundra te porta. Né lascian al portier Ferdigg degöna poscibilité de parda. Dô da 77' menüc él na bela aziun de atach cun deplú staziuns danter chi dl Acd. Ala trata te aria röia Denicolo che segna le secundo gol ladin.
Al 82ejim vegn anulé n gol al Mühlwald, püch denant à le bun arbiter scuré n fâl de jüch dan aria. Al 85' menüt segna Dallapiazza le 3 a 3, mó le arbiter veiga y scüra na poziun de fora dl jüch dl medemo. Pazienza….

SSV Mühlwald - ACD Val Badia: 3 - 2

Formaziuns Acd Val Badia: 1.Rene Ferdigg, 2.Matteo Ploner, Armin Plazza (dal 53' Florian Barbolini), 4.Max Videsott, 5.Alex Stampfer (dal 77' Tobias Fistill), 6.Alex Miribung, 7.Joel Unterweger, 8.Simone Dallapiazza (capitan), 9.Marc Mayr (dal 65' Simon Graffonara), 10.Luca Valentini, 11.Davide Denicolo.

Alenadú: Hanspeter "Pücia" Graffonara.

Gol: 1' Luca Valentini, 77' Davide Denicolo.

Proscima partida: en sabeda ai 22 de merz 2025 da les 15:00 sön la plaza da La Ila cuntra le Percha.