Sabda, 09. novëmber 2024
La fin dla pröma pert
N sabeda domisdé dales 14:30 él gnü soghé l’ ultima partida dl’ andata de campionat sön l’ ciamp dal palé da La Ila danter l’ ACD Val Badia y l’ ASV Raas. Al é sté na partida cun püces emoziuns cina la fin.
La partida mët man cun la pröma ocajiun por i ladins al 11^ cun Verginer che mët n bel cross dan porta aversara, mo al ne é degügn de sü compagns dailó por la trá te porta. Al 19^ röva n sogadú aversar sú dan Ferdigg y prô n paloneto, mo la trata vá de püch dlungia porta ia. Dui menüc dedô ti é l’ Raas da se porté sön l’ 1-0 cun na gran trata da fora d’ area che vá sön l’ pröm pé de porta y ne ti lascia degöna poscibilité a Ferdigg. Al passa n menüt y i todësc á bel indô na ocajiun cun na trata da fora d’ area, mo chësc iade para l’ portier ladin sigü. Al 32^ röva Miribung te area aversar cun na bela aziun y prô la trata, mo l’ portier é reatif y para. Al 39^ bat l’ Raas na trata dal ciantun diretamënter sön porta, mo Ferdigg é arjigne cá y para cun n bel intervënt. Al 45^ dá l’ arbiter ciamó dui menüc de recuper y insciö sciürel al 47^ la fin de n pröm tëmp cun püces emoziuns a pert l’ gol.
L’ secundo tëmp mët man cun na ocajiun por la Val Badia al 52^ canché l’ portier aversar ne abina nia l’ palé te süa area y insciö á la Val Badia la ocajiun da trá te porta, mo degügn ne é dailó. Dui menüc dedô á incé l’ Raas na ocajiun cun l’ atacant che ti sciampa ala defenjiun y röva sú dan Ferdigg, mo al vëiga la trata y para cun n bel intervënt. Dô chësta aziun ne sozedl plü nia por l’ rest dl’ secundo tëmp. Al 90^ dá l’ arbiter ciamó 3 menüc de recuper y insciö sciürel al 93^ la fin dla partida. Al é sté na partida cuaji da stufé por l’ publich, che á odü l’ ultima partida dla Val Badia por chësc 2024. Al é sté na pröma pert de campionat dër deludënt dla scuadra ladina y i sostenidus ladins passará la pausa invernala cun la speranza de n cambiamënt.
ACD Val Badia - ASV Raas: 0 - 1
Formaziun ACD Val Badia: 1. Ferdigg Rene, 2. Plazza Armin (dal 59^ 15. Pramstaller Lukas), 3. Barbolini Florian (dal 75^ 17. Clara F.), 4. Ploner Matteo, 5. Videsott Max, 6. Unterweger Joel, 7. Valentini Luca, 8. Stampfer Alex, 9. Dallapiazza Simone (dal 46^ 13. Miribung Alex), 10. Sintoni Emanuele, 11. Verginer Thomas.
Alenadú: Graffonara Hanspeter.
3. Amateurliga 2024/2025