Sabda, 07. setëmber 2024
Zero concretisaziun
N sabeda domisdé dales 15:30 él gnü soghé la partida de campionat de 3^ categoria sön l’ ciamp "Pradel" danter l’ ACD Val Badia y l’ SSV Mühlwald. Al é sté na partida dër ecuilibrada mo i sogadus da Mühlwald é stá mius da concretisé.
La partida mët man y al 8^ se porta la scuadra todëscia bel in vantaje cun na bela trata te area dl’ atacant che röva te porta por l’ 0-1. Al 15^ sciüra l’ arbiter na trata dai önesc metri por la Val Badia che vëgn trasformada da Denicolo cun na bela trata sigüda che porta le resultat indô sön l’ 1-1. Al 21^ á l’ Mühlwald ciamó na gran ocajiun cun na gran trata dal limit dl’ area che vá a sbaté cuntra la traversa dan co jí fora de campo. Al 35^ ti é i ghesć indô da se porté in vantaje cun na gran trata dl’ atacant che ne ti lascia degöna poscibilité a Ferdigg. Ara stá 1-2. Al 45^ vá n sogadú aversar jö por la fascia y mët ité n bel cross por n só compagn che mëss ma plü la trá te porta por l’ 1-3. Dô chësta aziun ne sozedl plü nia y insciö sciüra l’ arbiter la fin dl’ pröm tëmp dô dui menüc de recuper.
Le secundo tëmp mët man cun na ocajiun por l’ Mühlwald dô dui menüc canché n sogadú röva sú dan Ferdigg y prô dui iadi la trata, mo l’ portier ladin é te intrami i caji pronto y para les trates cun de bí intervënc. Al 59^ vá n sogadú aversar jö por la fascia, sé tira verso ité amez y lascia pié ia na trata che vá a sbaté sön l’ pé de porta. Dedô passá l’ palé dan döta la porta ia sënza che degügn ne l’ abines. Cater menüc dedô á Verginer na bela ocajiun cun na trata de puniziun, mo l’ palé vá de püch dlungia porta ia. Al 77^ sé porta l’ Mühlwald incé sön l’ 1-4 cun na trata saurida a püc metri dan porta dô n bel cross da na pert ité. Al 85^ á Bernardi na gran ocajiun por i ladins canché al ciafá l’ palé al limit dl’ area y lascia pié ia na bela trata che vá a sbaté cuntra l’ pé de porta. N menüt dedô á incé ciamó i aversars na ocajiun cun na trata dal limit dl’ area che vá de püch dlungia porta ia. Dô chësta aziun ne sozedl plü nia y insciö sciüra l’ arbiter la fin dla partida al 93^, dô trëi menüc de recuper, sön l’ resultat de 1-4. Al é sté na partida olaché la Val Badia á incé mostré n pêr de beles coses, mo la maiú pert ne vá nia ciamó bun y an pó l’ odëi dal resultat.
ACD Val Badia - SSV Mühlwald: 1 - 4
Formaziun ACD Val Badia: 1. Ferdigg Rene, 2. Miribung Alex, 3. Graffonara Simon (dal 46^ 17. Costner Lois), 4. Ploner Matteo, 5. Stampfer Alex (dal 76^ 16. Pramstaller Lukas), 6. Videsott Max, 7. Valentini Luca, 8. Clara Fabian (dal 46^ 13. Mayr Marc) , 9. Verginer Thomas, 10. Denicolo Davide (dal 69^ 14. Crepaz Luca), 11. Pizzinini David (dal 56^ 20. Bernardi Luca).
Alenadú: Graffonara Hanspeter.
Proscima partida: La proscima partida vëgn sogada n sabeda, ai 14 de setëmber, dales 15:30 cuntra l’ SC Percha sön l’ ciamp dal palé da Percha.
3. Amateurliga 2024/2025