Sabda, 24. agost 2024
Na partida sënza storia
N sabeda domisdé dales 17:00 él gnü soghé sön l’ ciamp "Pradel" da San Martin la partida de copa provinzia danter l’ ACD Val Badia y l’ SV Salurn. Al é sté na partida sënza storia olaché i todësc á davagné saurí.
La partida mët man y al 3^ vëigun bel l’ pröm gol dl’ Salurn. N sogadú vá jö sön la fascia y mët l’ palé ité amez por n só compagn che tira te porta por l’ 0-1. Al 24^ fej i todësc l’ secundo gol cun n bel cross te area por n atacant da Salurn che mëss ma plü la trá te porta por l’ 0-2. 6 menüc dedô, al 30^, sciüra l’ arbiter na puniziun por l’ Salurn. La trata vá amesa la barriera ladina fora y röva te porta por l’ 0-3. Gran fal di sogadus ladins. Al 38^ á i ghesć ciamó na ocajiun cun na bela trata dal limit dl’ area che vëgn parada cun n bel intervënt de Frenademetz. Dô chësta aziun ne sozedl plü nia y insciö sciüra l’ arbiter la fin dl’ pröm tëmp sön l’ resultat de 0-3.
La pröma ocajiun dl secundo tëmp pó l’ publich udëi al 53^ canché n sogadú aversar lascia pié ia na gran trata da fora d’ area che vá a sbaté cuntra la traversa dan co ruvé fora de ciamp. Dui menüc dedô á l’ Salurn ciamó na ocajiun cun na bela trata te area che vëgn parada da Frenademetz cun de bugn riflessi. Al 57^ se porta l’ Salurn incé ciamó sön l’ 0-4 cun na rebatöda te porta dô n bel intervënt dl’ portier ladin sön na trata da dalunc. La Val Badia ne pó nia fá tröp. Mo al 66^ ti é i ladins impó ciamó da fá n gol cun na bela trata te porta de Verginer por fá ciaré fora l’ resultat manco pesoch. Dô l’ gol ne sozedl plü nia y insciö sciüra l’ arbiter la fin dla partida al 93^. Al é sté na partida dominada dala scuadra da Salurn che ne ti a lascé cuaji degöna poscibilité ai ladins.
ACD Val Badia - SV Salorno: 1 - 4
Formaziun ACD Val Badia: 1. Frenademetz Dennis, 2. Ploner Matteo, 3. Costner Andre (dal 46^ 16. Palla Michele), 4. Videsott Max, 5. Miribung Alex, 6. Bernardi Luca (dal 46^ 14. Pizzinini David), 7. Valentini Luca, 8. Mayr Marc (dal 46^ 20. Dallapiazza Simone), 9. Verginer Thomas, 10. Denicolo Davide (dal 67^ 13. Ploner Alexander), 11. Stampfer Alex (dal 65^ 19. Crepaz Luca).
Alenadú: Graffonara Hanspeter.
Proscima partida: La proscima partida vëgn sogada n sabeda, ai 31 de agost, dales 16:30 cuntra l’ ASC Mareo/La Val sön l’ ciamp dal palé da Al Plan.
3. Amateurliga 2024/2025