ACD Val Badia - ASD Olang

Sabda, 20. aurì 2024

Na partida da desmentié

N sabeda domisdé dales 16:00 èl gnü soghé sön l’ ciamp dal palé da La Ila la partida de campionat de 3^ categoria danter l’ ACD Val Badia y l’ ASC Olang. Na burta prestaziun di ladins, che ne é nia sta bugn da se tigni i punc te ciasa.

L’ arbiter sciüra l’ scomenciamënt dla partida y al 16^ pon odëi la pröma ocajiun dla partida. N sogadú aversar lascia pié ia na bela trata da fora d’ area che vëgn deviada al ultim dala defenjiun ladina sön pé de porta dan co jí fora te ciantun. Al 19^ sciampa n atacant todësch ala defenjiun ladina, röva sú dan Ferdigg y prô la trata. Mo Ferdigg ti é da tigni sö l’ palé cun n gran intervënt. Al 34^ á l’ Olang indô na bela ocajiun cun na rebatüda corëta che vá de püch dlungia ia. Al foss sté n gol spetacular. 3 menüc dedô ti é spo la scuadra da Valdaora finalmënter da se porté in vantaje cun na bela trata de puniziun, bassa y sterscia, che ne ti lascia degöna poscibilité a Ferdigg por salvé l’ resultat. 0-1. Al 46^ se porta i ghesć sö dant cun na bela aziun y ciafá n bel gol cun na trata da 30 metri che vá dlungia Ferdigg ia dan co ruvé te porta. Dô chësta aziun ne sozedl plü nia y insciö sciüra l’ arbiter la fin dl’ pröm tëmp al 47^, dô dui menüc de recuper, sön l’ resultat de 0-2.
L’ secundo tëmp mët man y l’ Olang se porta sön l’ 0-3 cun la pröma aziun dô la palsa. N atacant ciafá l’ palé te area bel sú y prô la trata, mo Ferdigg ti dij de no y para cun n gran intervënt. Mo sön la rebatöda bassa ne pol nia plü fá tröp y insciö röva l’ palé te porta. La situaziun ne ciara nia fora bun por la Val Badia. Al 68^ röva n sogadú dl’ Olang sú dan l’ portier y se arjigna ca por la trata, mo Barbolini ti é ciamó al ultim da ti ruvé dô, l’ tigní sö y salvé i ladins dal cuarto gol. Dui menüc dedô, al 70^, á l’ Olang ciamó l’ ultima ocajiun dla partida cun na bela trata dal limit dl’ area che vá de püch dlungia porta ia. Dô chësta aziun ne sozedl nia plü tröp y insciö sciüra l’ arbiter la fin dla partida al 94^, dô 4 menüc de recuper. Al é sté na partida olaché ma öna na scuadra á soghé y la Val Badia ne á mai trat sön porta te döta la partida. Na burta prestaziun di ladins che porta ala pröma pordüda dla secunda pert de campionat.

ACD Val Badia - ASC Olang: 0 - 3

Formaziun ACD Val Badia: 1. Ferdigg Rene, 2. Miribung Alex, 3. Barbolini Florian (dal 84^ 18. Crepaz Luca), 4. Plazza Armin, 5. Stampfer Alex, 6. Ploner Matteo, 7. Videsott Max (dal 71^ 13. Pramstaller Lukas), 8. Clara Fabian (dal 46^ 15. Unterweger Joel), 9. Valentini Luca, 10. Denicolo Davide (dal 87^ 14. Ploner Alexander), 11. Verginer Thomas.

Alenadú: Graffonara Hanspeter.

Proscima partida: La proscima partida vëgn sogada n sabeda, ai 27 de aurí, dales 16:30 cuntra l’ SC Percha sön l’ ciamp dal palé da Percha.