Sabda, 04. novëmber 2023
L’ ultima por l’ 2023
N sabeda domisdé dales 14:30 él gnü soghé sön l’ ciamp dal palé da Falzes l’ ultima partida de campionat de terza categoria danter l’ SSV Pfalzen y l’ ACD Val Badia. La Val Badia á porvé cina al ultim da trá almanco fora n pari mo ara ne á nia orü ester.
La partida mët man y l’ publich mëss aspeté l’ 24^ por odëi la pröma ocajiun dla partida. Dô n cross te area ladina lascia n sogadú todësch pié ia na bela trata de cé che vëgn naota parada da Ferdigg cun n bel intervënt y vá spo a sbaté sön l’ pé de porta dan co ruvé fora de ciamp. Al 31^ á l’ Pfalzen ciamó na gran ocajiun cun na trata de puniziun da püc metri fora de area. La puniziun vëgn trata y vá indô a sbaté sön pé de porta dan co jí dlungia porta ia. Dui lëgns te set menüc por l’ Pfalzen. Al 35^ prô i padruns de ciasa ciamó da se porté inant cun n bel cross che röva te area ladina olache n sogadú mët jö l’ palé y tira cuntra Ferdigg. Mo Ferdigg é reatif y para la trata te ciantun. La trata dal ciantun röva te area olaché n defensur aversar l’ abina de cé y tira tl’ ciantun bass de porta por l’ 1-0. Degöna poscibilité por l’ portier ladin. 4 menüc dedô se porta i todësc atira sön l’ 2-0 cun na bela aziun che i porta dan porta olaché n sogadú fej n bel cross sura Ferdigg fora cun l’ palé che ti röva a n só compagn che mëss ma plü le trá te porta cun la porta öta. Dô chësta aziun ne sozedl plü nia y insciö sciüra l’ arbiter al 45^ la fin dl’ pröm tëmp sön l’ resultat de 2-0 por i padruns de ciasa.
L’ secundo tëmp mët man y la pröma ocajiun pon odëi al 56^ por la Val Badia. I ladins röva cun na bela aziun al limit dl’ area olaché Verginer lascia pié ia na bela trata che vëgn deviada al ultim momënt da n defensur sura porta fora. A cater menüc dala fin, al 86^, á l’ Pfalzen ciamó l’ ultima ocajiun dla partida cun na bela trata dal limit dl’ area ladina che vá de püch sura porta fora. Dô chësc ne sozedl plü nia y insciö sciüra l’ arbiter la fin dla partida al 93^, dô trëi menüc de recuper, sön l’ resultat de 2-0. Na partida olaché la Val Badia á tigní bun la defenjiun mo dant al mancé idees y fantasia che á porté a püces y degönes poscibilites.
ASD Pfalzen - ACD Val Badia: 2 - 0
Formaziun ACD Val Badia: 1. Ferdigg Rene, 2. Miribung Alex, 3. Graffonara Simon (dal 65^ 14. Barbolini Florian), 4. Ploner Matteo, 5. Videsott Max, 6. Kastlunger Mattia (dal 85^ 16. Pramstaller Lukas), 7. Denicolo Davide, 8. Pizzinini Luca (dal 46^ 17. Unterweger Joel), 9. Valentini Luca, 10. Bernardi Luca (dal 59^ 19. Clara Fabian), 11. Verginer Thomas (dal 79^ 18. Dallapiazza Simone).
Alenadú: Graffonara Hanspeter.
3. Amateurliga 2023/2024