ACD Val Badia - SV Wiesen

Sabda, 28. otober 2023

Degun jüch, degügn punc

N sabeda domisdé dales 15:30 él gnü soghé la partida de campionat de 3^ categoria danter l’ ACD Val Badia y l’ ASV Wiesen. Na partida sogada mal dala scuadra ladina che ne á mai albü na gran ocajiun por se porté punc a ciasa.

La partida mët man y la Val Badia á atira na ocajiun por trá cuntra porta cun Verginer che lascia pié ia na bela trata dal limit dl’ area che vá sura porta fora. Al 5^ á incé Wiesen na ocajiun cun l’ atacant che vëgn lancé sú cuntra Ferdigg y tira, mo l’ portier ladin para la trata cun n bel intervënt. Al 8^ á l’ Wiesen ciamó na ocajiun cun na trata cuntra porta che vëgn naota parada y spo salvada sön linea de porta dala defenjiun ladina. Al 13^ prô Valentini la conclujiun cuntra porta sön na trata dal ciantun. Chësta trata pëia ia y vá a sbaté cuntra pé de porta dan co ruvé fora de ciamp. Al 23^ é indô i todësc dan porta cun na bela trata dl’ atacant dal limit dl’ area che vëgn parada da n gran intervënt de Ferdigg. 4 menüc dedô ti é Ferdigg da paré na bela trata da plü dalunc di aversars, mo l’ palé resta dailó y insciö ti bastel ai ghesć trá te porta öta por l’ 0-1. Al 30^ ti é spo l’ Wiesen incé da se porté sön l’ 0-2 cun n bel gol de cé che vá sura Ferdigg fora dô n cross da na pert ite. Al passa 6 menüc y i ghesć ti é cinamai da se porté sön l’ 0-3. Dô n bel cross resta l’ palé n pez te area danter n pêr de contrasć dan che n sogadú todësch le ciafa danter i pisc y tira cuntra porta. L’ palé vá naota a sbaté sön pé de porta dan co ji ité por l’ terzo gol dla partida. Dô chësta aziun ne sozedl plü nia y insciö sciüra l’ arbiter al 46^, dô n menüt de recuper, la fin dl’ pröm tëmp.
Por podëi odëi la pröma aziun dl’ secundo tëmp mëss l’ publich aspeté l’ 74^ canché n atacant aversar röva te area ladina cun l’ palé, dribla n defensur y lasciá pié ia n strisciun che röva tl’ incrujada di lëgns y ne ti lascia degöna poscibilité a Ferdigg. 0-4. Incö ne él propi nia l’ dërt dé por i ladins. Chësta é incé l’ unica aziun importanta tl’ secundo tëmp y insciö ne ti restel al arbiter nia d’ ater da fá co sciuré la fin dla partida al 91^ dô n menüt de recuper. Na partida dominada dala scuadra da Wiesen che ti á lascé püces poscibilites ai ladins. La Val Badia á soghé mal incö y l’ 0-4 é ci che al nun vëgn fora.

ACD Val Badia - SV Wiesen: 0 - 4

Formaziun ACD Val Badia: 1. Ferdigg Rene (dal 86^ 12. Kastlunger Alex), 2. Graffonara Simon (dal 61^ 16. Dallapiazza Simone), 3. Ploner Matteo, 4. Mayr Marc (dal 46^ 19. Dalpiano Fabian), 5. Denicolo Davide, 6. Videsott Max, 7. Miribung Alex, 8. Kastlunger Mattia (dal 81^ 15. Barbolini Florian), 9. Verginer Thomas, 10. Valentini Luca, 11. Unterweger Joel (dal 76^ 14. Ploner Alexander).

Alenadú: Graffonara Hanspeter.

Proscima partida: La proscima partida vëgn sogada n sabeda, ai 4 de novëmber, dales 14:30 cuntra l’ SSV Pfalzen sön l’ ciamp dal palé da Falzes.