Sabda, 14. otober 2023
Degöna poscibilité
N sabeda domisdé dales 15:30 él gnü soghé la partida de campionat de terza categoria danter l’ ASV Uttenheim y l’ ACD Val Badia. Na partida olaché i ladins ne á nia albü tröpes poscibilites da rebalté l’ resultat tratan la partida.
La partida mët man y al 9^ pó l’ publich bel odëi l’ pröm gol dla partida. N sogadú aversar röva cina jö dal ciantun de ciamp y mët n bel cross bass ite amez olaché só compagn mëss ma plü la trá te porta por l’ 1-0 dl’ Uttenheim. Al 15^ ciafá Valentini l’ palé fora d’ area y lascia atira pié ia na gran trata che vá de dër püch dlungia porta ia. Al 45^ á i todësc ciamó na ocajiun cun na trata de puniziun a püc metri da porta. L’ sogadú aversar lascia pié ia na bela trata cuntra porta che vëgn parada cun n gran intervënt de Frenademetz che para l’ palé te ciantun. Sön la trata dal ciantun él n defensur dl’ Uttenheim che salta sö, tira de cé cuntra porta y fej gol por l’ 2-0. Do chësta aziun él incé l’ arbiter che sciüra la fin dl’ pröm tëmp dô dui menüc de recuper sön l’ resultat de 2-0 por i padruns de ciasa.
L’ secundo tëmp mët man cun na ocajiun por l’ Uttenheim al 48^ canché n atacant röva te area cun l’ palé y prô la trata cuntra porta, mo ara vá dlungia ia. Al 55^ ti é l’ Uttenheim da se porté sön l’ 3-0 dô na bela aziun. L’ atacant ti sciampa ala defenjiun ladina, vá cuntra porta y canché al é dan Frenademetz lascl pié ia na bela trata bassa che vá tl ciantun bass de porta. Al 62^ él spo incé ciamó Graffonara che ciafá la secunda ghela che porta a la cherta cöcena. Al mëss lascé la partida. Ara ne ô nia funzioné incö por la Val Badia. Por l’ rest dla partida ne sozedl nia plü tröp cina al 86^. Dô n cross te area ladina resta l’ palé n pez amesa i sogadus ité te n gran cajin dan che n sogadú todësch la ciafa sön l’ pé y tira te porta por l’ 4-0. Dô chësta aziun ne sozedl plü nia y insciö sciüra l’ arbiter al 90^ la fin dla partida sënza recuper sön l’ resultat de 4-0. Na partida olaché la Val Badia á albü püces poscibilites da fá incé ma un n gol cuntra na scuadra nia propi cis sterscia. Incö ne él propi nia sté l’ dërt dé por la Val Badia.
ASV Uttenheim - ACD Val Badia: 4 - 0
Formaziun ACD Val Badia: 1. Kastlunger Alex (dal 38^ 12. Frenademetz Denis), 2. Plazza Armin, 3. Kastlunger Mattia (dal 46^ 15. Unterweger Joel), 4. Denicolo Davide (dal 67^ 18. Barbolini Florian), 5. Graffonara Simon, 6. Videsott Max, 7. Miribung Alex (dal 79^ 19. Bernardi Luca), 8. Clara Fabian, 9. Verginer Thomas, 10. Valentini Luca, 11. Mayr Marc (dal 74^ 13. Crepaz Luca).
Alenadú: Graffonara Hanspeter.
Proscima partida: La proscima partida vëgn sogada n sabeda, ai 21 de otober, dales 17:00 cuntra l’ ASC Mareo B sön l’ ciamp dal palé da Al Plan.
3. Amateurliga 2023/2024