Sabda, 30. setëmber 2023
Combatüda mo pordüda
N sabeda domisdé dales 15:30 él gnü soghé la partida de campionat de terza categoria danter l’ ASC Olang y l’ ACD Val Badia. Na partida dër combatüda cina la fin (dant a döt l’ secundo tëmp) che á odü la scuadra de ciasa davagnan por püch.
La partida mët man y al 3^ pó l’ publich bel odëi l’ pröm gol. N atacant dl’ Olang pëia ia cuntra porta dô na bela passada de n compagn, röva dan Ferdigg y tira sura l’ portier fora y chësta röva spo te porta por l’ 1-0. 4 menüc dedô röva l’ Olang indô dan porta y prô la trata, mo chësc iade vá l’ palé sura fora. Al 19^ él indô l’ Olang che é dant cun na aziun che an ne vëiga nia vigni dé. L’ atacant tira cuntra porta y l’ palé vá a sbaté sön pé de porta, spo prol ciamó n iade mo chësc iadé él Ferdigg che para y spo prol ciamó n ultim iade la trata cuntra porta y chësta vá a sbaté cuntra la traversa y spo sura fora. Nia da crëie ciche al é sozedü te chisc 10 secunc. Al 23^ á i todësc indô na poscibilité cun na trata te area ladin, mo l’ 1 ladin é arjigné ca y para cun na grandiscima parada. Al 31^ pó l’ publich ciamó udëi l’ ultima aziun dl’ pröm tëmp cun na bela trata da dlungia porta de n atacant de ciasa, mo Ferdigg é indo reatif y salva i ladins dal secundo gol. Dô chësc ne sozedl nia plü tröp y insciö sciüra l’ arbiter la fin dl’ pröm tëmp al 46^, dô n menüt de recuper.
La pröma aziun dl’ secundo tëmp pon odëi al 56^ canché n atacant dl’ Olang röva te area y é pronto por la trata, mo al ultim momënt él Ploner M. che salta ité cun n bel intervënt y salva la porta ladina. Por odëi la proscima ocajiun da gol pó l’ publich aspeté l’ 78^ canche n sogadú de ciasa röva al limit dl’ area y lascia pié ia na bela trata bassa che vá de püch dlungia l’ pé de porta ia. An oress dí che la partida é destinada da se rové 1-0, mo al 95^ sozedl val de scandalus. N sogadú aversar röva dan Ferdigg, chësc vá fora adincuntra y ti tol l’ palé dai pisc sënza gragn problems. Te chël él l’ arbiter che sciüra n önesc metri por la scuadra de ciasa por n fal inesistënt. N fal dër pesoch dl’ arbiter che á mostré na gran incompetënza y püch edl por l’ jüch al palé. La trata dai önesc metri vëgn batüda püch dedô; gol y 2-0 por la scuadra de ciasa. Dô chësta aziun sciüra l’ arbiter la fin dla partida. Na partida dër combatüda olaché Olang á impó mostré da avëi plü cualité. Na gran partida de Ferdigg che á tigni l’ resultat plü bass de ciche al ess podü ester.
ASD Olang - ACD Val Badia: 2 - 0
Formaziun ACD Val Badia: 1. Ferdigg Rene, 2. Miribung Alex, 3. Ploner Matteo, 4. Graffonara Simon (dal 34^ 13. Bernardi Luca), 5. Plazza Armin, 6. Videsott Max, 7. Pizzinini David, 8. Pizzinini Luca (dal 79^ 14. Frenademetz Denis), 9. Verginer Thomas (dal 62^ 16. Ploner Alexander), 10. Valentini Luca, 11. Dallapiazza Simone.
Alenadú: Graffonara Hanspeter.
Proscima partida: La proscima partida vëgn sogada n sabeda, ai 7 de otober, dales 15:30 cuntra l’ SC Percha sön l’ ciamp dal palé "Pradel" da San Martin de Tor.
3. Amateurliga 2024/2025