Sabda, 09. setëmber 2023
Cun le dërt vare esun piá ia tl nú campionat
Cun na bela, tlera y buna prestaziun é piada ia la Val Badia tl campionat 2023/24. Sot ala direziun dl nú alenadù Hanspeter "Pücia" Graffonara. Tla scuadra fej pert der tröc jogn. Begn cater à "esordí" te chesta partida te 3a. categoria: Lukas, Armin, Joel y Fabian. Propi sciöche le campionat passé se rové cuntra la formaziun dl Prettau, à ince le nú metú man cuntra i medemi aversârs. Mo scé l`ultima anse pordú te ciasa, te chesta partida ne à i "tölderi" nia tigní dî bot cuntra na buna VB.
Döta la partida é gnöda soghada sot n der gran cialt. Al é ince gnú fat öna por temp, palses por bere. La pröma ocajiun por signè é dl Prettau al 7` menüt. Le nú Gasser röia bel sú ala trata dal limit, che atoca la stangia de porta. Dô da 17` de jüch aroba sön deplú contrasc Valentini le palê y röia dan porta ala trata. Chesta vegn rebatöda dal pé de porta. A legns stara segn un à un. Al 23` menüt röia le vantaje ladin, Denicolo passa bel t` aria a Luca "Pizzo" che lascia pié i na trata bassa secia sön le secundo pé de porta. Dô da 36` de jüch sön na pasaja da na pert ite de Valentini röia indô le nú dla VB ala trata. Che vegn indô rebatöda da pé de porta. Tl medemo menüt salta le set dla VB deplú defensurs tiran te porta. Le portier fej na gran deviaziun te ciantun. Al 47ejim tres tl pröm temp röia sú David Pizzinini dan le un dl Prettau. Mo süa trata röia alta fora de porta. Le 2 a 0 é tl aria. Püch dô le mete man dl secundo temp toma le 2 a 0. Pizzo passa à Valentini che röia t` aria da na pert ite meton le curan à mesa aria. Le plú arjigné é le önesc dla Val Badia che tira te porta. Al 61ejim sön na passada lungia de Graffonara röie le palê a Valentini sú dan le verdaporta, süa trata vegn indô rebotöda. N menüt dedô vegn anulé n bel gol al Prettau de cé dl nú Gasser, por na posiziun de fora dl jüch de só compagn. Al 77` röia ince le 3 a 0. Na trata de Miribung t` aria vegn rebatöda y röia dan i pîsc de Valentini che dan porta devieia ite danter deplú defensurs. Dô da 86` de jüch à ince Mayr na gran ocajiun rova sú dan le un Astner, süa trata vegn tignida sö. N menüt dedô toma ince ciamò le cuarto gol ladin. Mayr passa ite t` aria por Alexander Ploner che bat te porta por le 4 a 0. Chesc resultat é früt de na buna prestaziun de scuadra, düc´ i goi, al ness podú ester valgügn en plú, é tomá dô de beles aziun de jüch. N bun pié ia che fej tröp plajei.
ACD Val Badia - ASD Predoi: 4 - 0
Formaziun Val Badia: 1.Rene Ferdigg, 2.Alex Miribung (dal 89` Lukas Pramstaller), 3.Matteo Ploner (capitan), 4.Armin Plazza, 5.Max Videsott, 6.Simon Graffonara, 7.Luca Valentini, 8.Davide Denicolo (dal 46` Joel Unterweger), 9.Luca Pizzinini (dal 80` Marc Mayr), 10.Fabian Clara, 11.David Pizzinini (dal 57` Alexander Ploner).
Alenadù: Hanspeter "Pücia" Graffonara.
Goi: 23` Luca Pizzinini, 46` David Pizzinini, 77` Luca Valentini, 87` Alexander Ploner.
Proscima partida: en sabeda ai 16 de setember 2023 da les 15:30 sön la plaza "Plans" a La Val. Derby La Val – Val Badia.
Hanspeter "Pücia" Graffonara é le nú alendù dla Val Badia. Al à metú man cun na sodesfaziun te "Copa" y te campionat. Ti audun inant tröpa ligreza y sodesfaziun.
3. Amateurliga 2023/2024