Sabda, 26. agost 2023
Metü man cun l’ dërt vare
N sabeda domisdé dales 17:00 él gnü soghé la pröma partida dla sajun de copa provinzia danter l’ ACD Val Badia y l’ ASV Natz B. I ladins á metü man cun l’ dërt vare la sajun cun na gran prestaziun y na bela davagnada.
La partida mët man y l’ publich pó odëi la pröma ocajiun al 21^ canché n atacant aversar prô la conclujiun de cé cuntra porta dô na trata dal ciantun che vá de püch dlungia ia. Dui menüc dedô passa l’ Natz in vantaje cun na bela trata de puniziun che röva bassa tl’ ciantun de porta olaché Ferdigg ne pó plü fá nia. 0-1. Al 32^ él Valentini che á na gran ocajiun por i ladins cun na trata da dalunc mo l’ portier ti é da paré y l’ palé röva te ciantun. N menüt dedô prô incé Miribung la conclujiun da dalunc y indô ti é l’ portier da paré dlungia porta ia. Al 40^ él Valentini che á na gran oportunité cun na bela trata dal limit dl’ area che vëgn deviada dal defensur y vá a sbaté sön la traversa dan co jí fora de campo. Sön la trata dal ciantun él spo Mayr che ciafa l’ palé y prô la conclujiun mo chësta vëgn indô parada dal portier todësch. Ara ne ó nia jí por la scuadra ladina. Al 45^ sciüra l’ arbiter la fin dl’ pröm tëmp sön l’ resultat de 0-1.
L’ secundo tëmp mët man bun por la Val Badia che ti é da parejé la partida al 47^ cun Valentini che ti tol l’ palé an defensur aversar y lascia pié ia na bela trata sot la traversa olaché l’ portier pó ma plü ti ciaré. 1-1. 3 menüc dedô se porta l’ Natz in vantaje. N defensur ladin perd l’ palé t’ area olaché n aversar é atira dailó por ti tó l’ palé y l’ trá te porta. 1-2. Al 55^ á i ghesć ciamó na ocajiun cun n sogadú che vëgn lancé sú cuntra la porta ladina mo Ferdigg salta fora adora assa y salva la Val Badia dal terzo gol. Al 71^ él Verginer che vá dan porta aversara a fá na gran presciun sön l’ portier cina che chësc la perda y ti la scinca a Verginer. Chësc la mët ité amez dan porta olaché Valentini aspeta bele por la trá te porta y parejé la partida. 2-2. Al 85^ röva la Val Badia te area aversara cun na gran aziun, Verginer ciafá l’ palé, dribla n defensur y tira tl’ ciantun bass de porta por l’ vantaje ladin a 5 menüc dala fin. 3-2. Al 88^ á Valentini ciamó l’ ocajiun por fá l’ terzo gol cun na trata cuntra porta dô n bel cross de Verginer mo chësta vá sura fora. Al 90^ se porta i ladins ciamó sön l’ 4-2 cun Ploner A. che, cun npü de furtüna, ciafá na bela conclujiun cuntra porta che passá dlungia l’ portier ia y vá te porta. Chësta é incé l’ ultima ocajiun dla partida deaché al 93^, dô 3 menüc de recuper, sciüra l’ arbiter la fin dla partida. Na partida sogadá dër bun dala Val Badia cun tröp coraje y determinaziun. N bun scomenciamënt de sajun!
ACD Val Badia - ASV Natz B: 4 - 2
Formaziun ACD Val Badia: 1. Ferdigg Rene, 2. Miribung Alex, 3. Mayr Marc (dal 81^ 14. Ploner Alexander), 4. Plazza Armin, 5. Ploner Matteo, 6. Barbolini Florian, 7. Pizzinini Luca, 8. Graffonara Simon, 9. Verginer Thomas, 10. Valentini Luca, 11. Unterweger Joel (dal 46^ 13. Kostner Andre) (dal 89^ 15. Pramstaller Lukas).
Alenadú: Graffonara Hanspeter
Proscima partida: La proscima partida vëgn sogada n sabeda, ai 9 de setëmber, dales 15:30 cuntra l’ ASV Prettau sön l’ ciamp dal palé "Pradel" da San Martin.
3. Amateurliga 2023/2024