Domënia, 23. aurì 2023
Trëi punc miritá
N domënia, ai 23 de aurí, él gnü soghé la partida de campionat de 3^ categoria danter l’ ACD Val Badia y l’ FCD Gitschberg Jochtal B. Na gran prestaziun di ladins sot la plöia ti á dé i 3 punc ai padruns de ciasa.
La pröma ocajiun dla partida ti capitëia al 15^ a Stampfer cun na trata de puniziun che vëgn parada cun n gran intervënt dl’ portier aversar, la Val Badia mëss se acontenté cun na trata dal ciantun. Al 19^ él Pizzinini D. che á la proscima ocajiun por i ladins cun na bela trata dal limit dl’ area che vëgn parada dal portier. Al 22^ él Dallapiazza che röva cun na bela aziun dan porta y lascia pié ia na gran trata che röva te porta por l’ 1-0 ladin. Dallapiazza é te n gran momënt cun 3 goi te 2 partides. 2 menüc dedô, al 24^, él l’ Gitschberg che porta indô söl pêr la partida cun na bela trata de puniziun. Le mür ladin por la puniziun se á daurit y insciö é le palé passé amesa fora dan co ruvé te porta. 1-1. Dô chësta aziun ne sozedl nia plü tröp tl pröm tëmp y insciö él l’ arbiter che sciüra al 45^ la fin dl’ pröm tëmp sön l’ resultat de 1-1.
La pröma aziun dl secundo tëmp é l’ publich che á podü odëi al 50^ cun Pizzinini D. che á na ocajiun de cé dan porta, mo l’ portier é reatif y para la trata. N menüt dedô ti é i todësc da se porté in vantaje cun na bela trata da dalunc olaché Ferdigg ne pó plü fá nia por evité l’ svantaje ladin. 1-2. Al 57^ él indô Pizzinini D. che á na ocajiun canche al röva dan l’ portier y prô la trata bassa, mo chësta vëgn naota parada dal portier y spo trata tl ciantun dan defensur. Sön la trata dal ciantun ti é spo la Val Badia da se porté indô sön le pêr cun na trata de pröma de Crepaz che vá tl ciantun bass de porta y ne ti lascia degöna poscibilité al portier aversar. 2-2. Al 61^ él Pizzinini L. che ciafa na bela passada t area y prô atira la trata che vá de püch dlungia ia. Al 76^ él Pizzinini L. che pëia ia cun na gran aziun, dribla dui defensurs y püch dedô él n aversar che le rosedosa t area todëscia. L’ arbiter sciüra y ti dá na trata dai önesc metri ai ladins. Fersuoch sbalia naota la trata dai önesc metri mo al fej gol sön la rebatöda. I ladins é indô in vantaje por 3-2. Al 79^ ciafa la Val Badia na trata de puniziun: Fersuoch la bat y passa l’ palé a Sintoni che mëss ma plü le trá te porta por l’ 4-2 definitif. Al 90^ él ciamó l’ arbiter che dá 4 menüc de recuper y al 94^ sciürl la fin dla partida. N gran suzess por la Val Badia che se porta a ciasa i trëi punc dô avëi combatü por 90 menüc.
ACD Val Badia - FCD Gitschberg Jochtal B: 4 - 2
Formaziun ACD Val Badia: 1. Ferdigg Rene, 2. Miribung Alex, 3. Graffonara Simon, 4. Crepaz Omar, 5. Fersuoch Kevin, 6. Ploner Matteo, 7. Valentini Luca (dal 59^ 16. Pizzinini Luca), 8. Stampfer Alex, 9. Pizzinini David (dal 71^ 14. Denicolo Davide) (dal 78^ 17. Sintoni Emanuele), 10. Dallapiazza Simone (dal 80^ 15. Ploner Alexander), 11. Videsott Max.
Alenadú: Crepaz Gianni
Proscima partida: La proscima partida vëgn sogada n sabeda, ai 29 de aurí, dales 15:30 cuntra l’ US La Val sön l’ ciamp dal palé da La Val.
3. Amateurliga 2023/2024