Domënia, 09. otober 2022
Gol nia fat, gol ciafé
Te na domënia domisdé d’ altonn él gnü soghé la partida de campionat de 3. Categoria danter l’ SSV Pfalzen y l’ ACD Val Badia. Sön l’ ciamp dal palé da Falzes él gnü soghé na partida dër combatüda cun la Val Badia che á spreché n gröm de ocajiuns.
La partida mët man cun na grandiscima ocajiun por la Val Badia bel al 2^. Schrott ciafa l’ palé y lascia pié ia na bela trata sura la defenjiun, mo l’ portier ti è ciamó al’ ultim da devié l’ palé sön la traversa dan che chësc vais fora de campo. Por udëi la proscima ocajiun mëssun aspeté l’ 28^ canché l’ Pfalzen á la poscibilité da se porté in vantaje cun na trata de cé, mo chësta è massa debla y Frenademetz pó la paré saurí. Al 30^ él la Val Badia che pëia ia cun na bela aziun. Canche l’ palé röva te area él Pizzinini che passa a Bernardi che lascia pié ia na bela trata, mo ara vëgn parada dal portier. 2 menüc dedô, al 32^, él Videsott che á na ocajiun cun na trata cuntra porta aversara, mo chësta è zentrala y vëgn indô parada dal portier todësch. Al 33^ él indô la Val Badia te area aversara cun na bela aziun, mo l’ aziun devënta dër confujiunala y i ladins perd tosc l’ palé. Ala fin él ciamó Bernardi che prô la trata, mo chësta vá dlungia ia. Al 37^ él indô i todësc che á na ocajiun cun l’ atacant che röva sú dan Frenademetz, mo chësc salva le resultat cun n gran intervënt. Al 42^ él indô l’ 1 ladin che salva l’ resultat cun na gran parada, dô che n sogadú aversar á trat cuntra porta a püc metri de destanza. Al 45^ él l’ arbiter che ti scinca na trata dai önesc metri a Pfalzen. N gran fal dl’ arbiter, deache l’ defensur ladin ne á fat degun fal. L’ önesc metri vëgn trasformé y i todësc se porta sön l’ 1-0. N menüt dedô él l’ arbiter che ti dá incé na trata dai önesc metri ai ladins che Pizzinini L. mët te porta y porta la partida indô söl pêr. 1-1. Al 47^ él l’ arbiter che sciüra la fin de n pröm tëmp cun tröpes ocajiuns y tröc fai sön trames les perts.
L’ secundo tëmp mët man cun na ocajiun por l’ Pfalzen al 47^ cun na trata dal limit dl’ area, saurida da paré por Frenademetz. Al 54^ ti è la scuadra da Falzes indô da se porté in vantaje. Dô na bela trata de puniziun él l’ indemo sogadú che â bel fat l’ pröm gol che salta de cé y tira l’ palé te porta. 2-1. Al 62^ él l’ Pfalzen che vá dër dlungia al 3-1 cun na trata de puniziun che vá a sbaté sön l’ pé de porta. Dër na bela trata da pert dl’ sogadú todësch. Al 81^ él la Val Badia che á l’ ultima ocajiun dla partida cun Del Negro che lascia pié ia na bela trata d’ esterno da fora d’ area, mo la trata è massa zentrala y insciö pó l’ portier paré. Al 95^, dô 5 menüc de recuper, él l’ arbiter che sciüra la fin dla partida. Al è ste na partida cun gran intensité y tröpes ocajiuns sön trames les perts. Tl secundo tëmp ne él nia plü sozedü tröp y insciö él incé la partida che se è rovada sön l’ 2-1 por l’ Pfalzen.
ASD Pfalzen - ACD Val Badia: 2 - 1
Formaziun ACD Val Badia: 1. Frenademetz Denis, 2. Miribung Alex, 3. Pellegrini Davide, 4. Crepaz Omar, 5. Ploner Matteo, 6. Barbolini Florian, 7. Bernardi Luca (dal 56^ 14. Emanuele Sintoni), 8. Stampfer Alex (dal 66^ 16. Del Negro Roberto), 9. Videsott Max (dal 74^ 17. Pizzinini David), 10. Pizzinini Luca, 11. Schrott Felix (dal 78^ 18. Dallapiazza Simone).
Alenadus: Crepaz Gianni/Hanspeter Graffonara.
Proscima partida: La proscima partida vëgn sogada n domënia, ai 16 de otober, dales 15:30 cuntra l’ Dietenheim sön l’ ciamp dal palé da La Ila.
3. Amateurliga 2023/2024