A.C.D. VAL BADIA - A.C.D. VAL BADIA - der Fußball im Gadertal

Sabda, 07. mà 2022

N resultat esageré

Te na sabeda sëra buna cialda da d' aisciöda él gnü soghé la partida de campionat danter l’ SAV Steinhaus y l’ ACD Val Badia.

De sabeda sëra él gnü soghé la partida de campionat de 2^ categoria danter l’ SAV Steinhaus y l’ ACD Val Badia. Chësc è l’ pröm iade in chësc ann che l’ ACD Val Badia süga de sabeda sëra y chësc nü orar ne ti á nia porté fortüna te na partida dominada dala scuadra todëscia.
La partida mët man y l’ ACD Val Badia passa bel atira in vantaje al 1^. Dô che Denicolo vëgn metü in movimënt da na bela passada de Schrott, él chësc che subësc n fal t area aversaria y insciö ti vëgnel dé na trata dai 11 metri ala scuadra ladina. Fersuoch se tol sö la inciaria da trá l’ 11 metri y le trasforma cun na bela trata tl ciantun bass de porta . Ara stá 0-1. Mo le vantaje ne döra nia dî deache l’ Steinhaus recuperëia bele al 5^ y se porta söl 1-1 cun na trata de cé che röva al incrujada di lëgns dô n bel cross da fora d’ area che è rové avisa sön l’ cé dl’ atacant. Al 18^ toml spo l’ 2-1 por la scuadra da Steinhaus che mët ite n cross bass amesa l’ area dl’ portier ladin olache n sogadú todësch ti è ciamó al’ ultim momënt da ruvé sön l’ palé y le trá te porta. La situaziun è atira gnüda ribaltada dala scuadra che ocupëia l’ 2^ post te classifica. Al 29^ él indô l’ Steinhaus che á na gran ocajiun cun n sogadú che pëia ia dal zënter dl’ ciamp, driblëia n pêr de sogadus ladins y lascia pié ia na bela trata che vá sura porta fora. 2 menüc dedô, al 31^, él la Val Badia che á na ocajiun cun na bela aziun che i porta cina dan porta aversara, mo la trata de Schrott vëgn parada dal’ portier aversar. Al 45^ ti vëgnel "scinché" na trata dai 11 metri ai padruns de ciasa por n fal che n defensur ladin á fat sön l’ aversar che ê mez meter fora dl’ area dl’ portier. N gran fal dl’ arbiter. La trata dai 11 metri vëgn eseguida, l’ palé röva te porta y l’ Steinhaus se porta sön l’ 3-1 püch dan la fin dl’ pröm tëmp. Do la trata dai 11 metri él l’ arbiter che sciüra la fin dl’ pröm tëmp sënza dé recuper.
L’ secundo tëmp mët man cun la proscima ocajiun por la scuadra todëscia che röva cun dër na bela aziun dan porta y lascia pié ia na gran trata che vá de dër püch dlungia porta ia. Al 51^ él spo l’ Steinhaus che se porta söl 4-1. Sön n cross ite t area él Ferdigg che prô da apié l’ palé, mo al ti sciampa al’ ultim y insciö él l’ atacant aversar che mëss ma plü le sburlé te porta. Al 67^ él indô i todësc che prô da ti sciampé ala defenjiun ladina y canche ai è dan porta prôi la trata mo chësc iade él Ferdigg che salva la porta ladina cun na grandiscima parada. Al 69^ ti è la scuadra de ciasa cinamai da se porté sön l’ 5-1. Sön na gran trata di todësc ti è Ferdigg da tigni sö l’ palé, mo nia da l’ tigni tles mans, y insciö pó l’ atacant madër sburlé l’ palé te porta sënza gragn problems y porté süa scuadra sön l’ 5-1. Do chësta aziun ti è la Val Badia da tigni dër bun l’ ciamp y ti ultims 25 menüc ne ti è l’ Steinhaus plü da fá nia de prigorus. Y insciö, al 94^, dô 4 menüc de recuper, él l’ arbiter che sciüra la fin dla partida. Na partida cun n resultat nia dl’ döt iüst deache la Val Badia ne á nia soghé mal y se á incé defenü dër bun, mo ala fin él impó tlêr che l’ Steinhaus á na scuadra cun plü cualité.

SAV Steinhaus - ACD Val Badia:  5 - 1

Formaziun ACD Val Badia: 1. Ferdigg Rene, 2. Conrater Heinrich, 3. Kastlunger Mattia, 4. Graffonara Simon, 5. Fersuoch Kevin, 6. Barbolini Florian, 7. Valentini Luca, 8. Stampfer Alex (C) (dal 73^ 13. Ploner Matteo), 9. Mayr Marc (dal 68^ 15. Pizzinini David), 10. Denicolo Davide (dal 46^ 14. Ploner Alexander), 11. Schrott Max.

Alenadú: Crepaz Gianni.

Proscima partida: La proscima partida vëgn sogada in domënia, ai 15 de má, dales 16:00 cuntra l’ Taisten Welsberg sön l’ ciamp dal palé "Pradel" a San Martin de Tor.