ACD Val Badia - ASV Gossensass

Domënia, 01. má 2022

Finalmënter la pröma davagnada dla sajun

Sön l' ciamp dal palé da San Martin de Tor él gnü soghé la partida danter l’ ACD Val Badia y l’ ASV Gossensass.

Te n domisdé d' aisciöda él gnü soghé la partida de campionat de 2^ categoria danter l’ ACD Val Badia y l’ ASV Gossensass. Cun na gran prestaziun ti è i ladins stá bugn da davagné la pröma partida de campionat da chësc ann.
La partida mët man cun la pröma gran ocajiun al 19^: Schrott F. röva dan porta aversara y lascia pié ia na bela trata che vëgn parada dal portier dl’ Gossensass. 3 menüc dedô, al 22^, él indô Schrott F. che á na chance do na bela passada de Denicolo, mo l’ portier todësch para indô y insciö resta l’ resultat söl 0-0. Al 36^ él spo la proscima ocajiun por la Val Badia che sön na trata dal ciantun manacia da fa gol cun na bela trata de cé che l’ portier aversar ti è da paré cun na gran parada. 2 menüc dedô, al 38^, ti è spo i ladins finalmënter da se porté sön l’ 1-0 cun na grandiscima aziun. Kastlunger vëgn lancé sön la fascia, röva cina tl area dl ciantun y mët t’ area n bel cross por Schrott M. che mëss insciö ma plü sborlé l’ palé te porta. Al 40^ él l’ Gossensass che á na ocajiun cun na trata dal limit dl area dl portier che vá de püch sura porta fora. Al 47^, dô 2 menüc de recuper, él l’ arbiter che sciüra la fin dl pröm tëmp sön l’ 1-0 por la scuadra ladina.
Le secundo tëmp mët man cun na ocajiun por l’ Gossensass che röva cun na passada filtranta dan Ferdigg, mo l’ atacant todësch ne á degöna prezijiun y tira dlungia porta ia. Al 51^ garetl l’ 2-0 por la Val Badia. Schrott M. vëgn lancé sú cuntra porta, al röva dan l’ portier y cun na trata prezisa tirl l’ palé te porta. L’ ACD Val Badia desmostra che, sce ai ô, ai n gran potenzial. Al 53^ él i todësc che á na grandiscima ocajiun cun na gran trata che vëgn parada da Ferdigg, vá a sbaté cuntra la traversa y vá sura porta fora. I ladins á sëgn albü na gran fortüna. Al 16^ él l’ Gossensass che á na gran ocajiun cun na puniziun dal limit dl’ area: l’ sogadú se posizionëia bun l’ palé, tol sbunf y lascia pié ia na gran trata che vá diretamënter sot l’ incrujada di lëgns. Ferdigg azica ciamó l’ palé cun la piza di dëic, mo al ne á degöna poscibilité. Sëgn è la Val Badia ma plü dant de un n gol. Y 4 menüc dedô ti è spo i todësc cinamai da se porté sön l’ 2-2. Dô na bela trata da fora d’ area él Ferdigg che para mo l’ palé ti röva dan i pisc al’ atacant da Gossensass che mëss ma plü le sburlé te porta. Sëgn è la partida indô in parité. Al 75^ él spo indô l’ Gossensass che á na poscibilité da signé: dô na remetüda laterale che röva te area dl’ portier él n sogadú aversar che tol l’ palé de cé y pro la trata cuntra porta, mo Ferdigg è preparé y para tranquilamënter. Al 77^ él n defensur dl’ Gossensass che ciafa l’ palé te süa area y prô dal trá demez. L’ palé vá indere a sbaté cuntra Schrott F. y vá spo de püch dlungia porta ia. Al 84^ él la defenjiun todëscia che tira demez l’ palé do n bel cross. Sön chësc palé él Valentini che röva y lascia pié ia na gran trata da fora d’ area de pröma che vá te porta y ne ti lascia degöna poscibilité al portier da Gossensass. La Val Badia è indô dant 3-2 y al mancia ma plü 6 menüc cina al 90^. Do l’ gol ne sozedl nia plü tröp y al 97^, do 7 menüc de recuper, él l’ arbiter che sciüra la fin dla partida. L’ ACD Val Badia, cun na gran prestaziun, ti è stá da davagné la pröma partida de chësta sajun dal palé. Tröpes aziuns y tröpes ocajiuns á desmostre che l’ ACD Val Badia pó incé fa deplü de ci che ai á fat cina sëgn.
A Schrott Felix ti vëgnel aodé na buna varijun dô l’ inzidënt rimedié intratan la partida cuntra l’ Gossensass.

ACD Val Badia - ASV Gossensass: 3 - 2

Formaziun ACD Val Badia: 1. Ferdigg Rene, 2. Conrater Heinrich, 3. Kastlunger Mattia, 4. Graffonara Simon, 5. Fersuoch Kevin, 6. Barbolini Florian, 7. Denicolo Davide (dal 64^ 15. Valentini Luca), 8. Stampfer Alex, 9. Schrott Max (dal 94^ 14. Mayr Marc), 10. Del Negro Roberto, 11. Schrott Felix (dal 79^ 16. Dallapiazza Simone).

Alenadú: Crepaz Gianni.

Proscima partida: La proscima partida vëgn sogada in sabda, ai 7 de má, dales 19:00 cuntra l’ Steinhaus sön l’ ciamp dal palé da Steinhaus.