Sabda, 16. aurì 2022
Ara vá ma da perde
Te n domisdé dër da vënt él gnü soghé sön l’ ciamp dal palé da La Ila la partida danter l’ ACD Val Badia y l’ ASV San Laurenz.
Sön l’ ciamp dal palé da La Ila él gnü soghé la partida de campionat de 2^ categoria danter l’ ACD Val Badia y l’ San Laurënz. Indô na prestaziun dër deludënta dla scuadra ladina che ne sá nia plü co che an fej da davagné.
La partida mët man y l’ San Laurënz mët bel l’ palé te porta dô 10 menüc. L’ atacant todësch vëgn lancé sú cuntra porta y canche al röva dan porta él dër sauri da fa gol, deache al ne á degun defensur dlungia o dant. 1-0 por l’ San Laurënz. Al 18^ él la scuadra todëscia che á na ocajiun cun l’ atacant che, dô n cross bass che röia t’ area, pro la trata te porta mo l’ palé vá de püch dlungia l’ pé de porta ia. Al 27^ él spo la proscima ocajiun por la scuadra dla Val de Puster cun na trata de cé, dô na trata dal’ ciantun, che Valentini ti è ciamó da trá demez canche l’ palé è bel sön la linea de porta. Al á salvé i ladins al’ ultim mumënt dal 0-2. Al 30^ él spo ince la Val Badia che á la pröma ocajiun dla partida cun Pizzinini D. che prô la trata dan porta mo ara vëgn tignida sö. Sön la rebatüda él spo Pizzinini L. che lascia pié ia na gran trata olache l’ portier mëss fá n mez miracul por salvé la porta y paré l’ palé sura porta fora. 2 menüc dedô, al 32^, él spo indô l’ San Laurënz dan la porta ladina cun n cross che röva t’ area. Mo püch dan che i sogadus todësc ti è da trá te porta l’ palé él Kastlunger che l’ tira demez y salva insciö la porta ladina. Mo sön la trata dal ciantun él n defensur todësch che salta sö de cé y l’ palé vá te porta por l’ 0-2. 2 menüc dedô, al 35^, él Frenademetz che fej n grandiscimo fal y ti mët l’ palé söi pisc al’ atacant aversar, che prô la trata mo è ciamó plü stlet y tira dlungia ia. La cualité che i sogadus mostra te campo è dër bassa da trames les perts. Al 38^ él n atacant dl’ San Laurënz che röva dan l’ purtier ladin y tira, mo chësc iade él Frenademetz che para la trata te ciantun cun n gran intervënt. Mo al 43^ él spo i todësc che se porta sön l’ 3-0. Do che n sogadú aversar á lascie pié ia na trata debla e zentrala da fora d’ area, él Frenademetz che fej n grandiscimo fal y lascia jí l’ palé te porta sciöche sce al ne foss ste degügn te porta. N gran fal dl portier ladin che ti scinca l’ 0-3 ai aversars. Al 46^, do un n menüt de recuper, él l’ arbiter che sciüra la fin dl’ pröm tëmp sön l’ resultat d’ 0-3.
L’ secundo tëmp mët indô man cun na ocajiun por l’ San Laurënz al 57^. Do che n atacant aversar è ruvé t area, prôl la trata sön l’ pröm pé de porta mo l’ palé vá de püch dlungia ia. Al 60^ él indô i todësc dant cun na trata da fora d’ area, mo Frenademetz la vëiga adora assa y ti è da paré. Al 74^ él spo incé la Val Badia che á la pröma ocajiun dl’ secundo tëmp cun Stampfer che röva al limit dl’ area y lascia pié ia na gran trata che vá a sbate cuntra la traversa y vá spo fora de ciamp da jüch. 2 menüc dan la fin, al 88^, él ciamó i ladins che á l’ ultima ocajiun dla partida cun Schrott che röva t’ area aversara cun l’ palé y tira, mo n defensur ti è da devié l’ palé al’ ultim momënt y insciö vá la trata dlungia porta ia. Al 93^, do 3 menüc de recuper, él l’ arbiter che sciüra la fin de na partida dominada da la scuadra todëscia che ne ti á lascé degöna poscibilité da davagné a la scuadra ladina. L’ ACD Val Badia è drio soghé na sajun calcistica dër deludënta cun gnanca ciamó öna na partida davagnada.
ACD Val Badia - ASD San Laurënz: 0 - 3
Formaziun ACD Val Badia: 1. Frenademetz Denis, 2. Mayr Marc, 3. Kastlunger Mattia, 4. Graffonara Simon, 5. Valentini Luca (dal 46^ 14. Conrater Heinrich), 6. Barbolini Florian, 7. Denicolo Davide (dal 53^ 16. Ploner Alexander), 8. Stampfer Alex, 9. Pizzinini Luca, 10. Del Negro Roberto, 11. Pizzinini David (dal 46^ 17. Schrott Max).
Alenadú: Crepaz Gianni.
Proscima partida: La proscima partida vëgn impormó sogada te 2 domënies, ai 1 de má, dales 16:00 cuntra l’ Gossensas sön l’ ciamp dal palé da La Ila.
3. Amateurliga 2023/2024