Domënia, 29. setëmber 2019
Bugn terzi te tlassament, deventa cuntra le jon Falzes che ná scinche nia
Tl mete man dla partida él bel cialdin y la plaza "Pradel" te buniscimes codiziun, da fá complimnec. La jona scuadra da Falzes à pordú dötes les prömes cater partides de campionat, mo le alenadú Curti comana le mascimo impegn y conzentraziun. Interesant che sciöche secundo alenadú à chi da Falzes n ladin, Heini Chizzali de Canal che à soghè tröc agn sön chesta plaza cun l' US San Martin y la chonesc dër bun. Sce al é spo en vantaje sarâl da ödei ala fin dla partida.
La VB met atira man atacan, é röia tosc à les prömes ocajiuns. Al 1^ menüt él dös trates de Masoch che vegn rebatödes. Dô da 3^ de jüch mess sön n cross de Erlacher alzé le un dl Falzes püch sura l' incrujada fora. Al 8^ menüt tira le diesc Maurberger en striscun te porta, Ferdigg robat cun les man la gran trata. Al 9^de jüch röi le vantaje, dan porta di pustri él en pú en sot y sura. Deplú trates vegn rebatödes, ince la pröma de Kastlunger che röia à n meter dan porta ala secunda deviaziun bassa te rei por le gol. Dô da 22^ menüc roda te porta Farenzena en bel palé, mo le un Plankensteiner é atent y para sigú. Dô da 39^ de jüch él n cross de H.Clara dan porta che le diesc Maurberger roda de ce te porta, lascé sú dai defensurs ladins. Ferdigg é bun cun na gran parada cun la man püch dan la ligna da devié da na pert fora. Al 40ejin röia da na pert ite bel sú t' aria Kastlunger che tira alta fora le "palé" dl poscibl 2 a 0. Dui menüc dedô röia ala trata Stampfer t' aria, le verdaporta dl Falzes robat la gran trata. Le pröm temp se stlüj jö insció cun le minim vantaje por la VB. Al 60^ menüt röia t' aria le capitan ladin en contat cun le portier puster. Stampfer resta ia por tera mo al né nia en fâl che porta à n' önesc metri. Dui menüc de jüch dedô röia sú da na pert ite t' aria Lorenzini. Süa trata bassa sön le secundo pé röia fora nia de tröp dan pé bass. Finalmenter röia le 2 a 0. Al 67^, sön en bel cross de "Matti" röia bel sú dan porta ala deviaziun secia y avisa te rei Farenzena. Le resultat é segn al sigú. Dô da 78^ menüc pert le bun portier Plankensteiner le palé t' aria cuntra Masoch che podess trá te porta öta. Mo le un toma ia por tera dasú y le arbiter scüra en fâl inesistent salvan ai pustri le 3 a 0. Na picia protesta ne porta à nia. Dô da 82^ de jüch vegn desgort le ot Ciardi por dopla amoniziun. Dös bele parades dl "miu" dl Falzes Plankensteiner sön Stampfer y Masoch al 83^ y 86^ fej resté le resultat sön le 2 a 0. Dô chisc trei punc, pon se gode le terzo post à dui punc dai pröms.
ACD Val Badia - ASD Pfalzen: 2 - 0
Formaziun Val Badia: 1.Rene Ferdigg, 2.Simon Erlacher, 3.Matteo Ploner, 4.Gianluca Lorenzini, 5.Kevin Fersuoch, 6.Florian Barbolini, 7.Simone Masoch, 8.Alessandro Da Roit, 9.Mattia Kastlunger (dal 68^ Cristian Granruaz), 10.Matthias Stampfer (capitan) (dal 85^ Alessandro Dapunt), 11.Enrico Farenzena.
Alenadú: Cristian Curti.
Goi por la Val Badia: 9^ Mattia Kastlunger, 67^ Enrico Farenzena.
Proscima partida: en domenia ai 6 d' otober 2019 dales 15:30 sön la plaza da Mühlwald cuntra le Mühlwald.
3. Amateurliga 2023/2024