Domënia, 31. merz 2019
Le Mareo davagna ince le secundo derby cuntra la Val Badia cun n sech 0 a 3.
Le gol subí bele tl secundo menüt ti à taié en pú les iames ala Val Badia.
Trames les scuadres à por le derby sughè sön la nöia plaza da La Ila, traverc desvalis. Sce i ghesc dl Mareo é bel feter sigüsc de podei ince le proscimo campionat soghè te secunda y pó afronté le derby senza tröp druch. La Val Badia dô la bela prestaziun cun deventa cuntra le Gais adora inant punc por se trá fora da les eghes pazes dla retrocesciun. I é sot presciun. I önesc de Curti ne pó nia mete te ciamp trami i "Alex" Felder y Stampfer. I le mesaciamp mess gní invente da nú. I önesc de Mutschlechner é tlá miú formaziun. N bel cialt y en bel publich fej da cornisc al derby.
Atira dô ma dui menüc toma bele le vantaje por i ghesc. Na passada lungia cuntra aria dla VB pê senza prigo, le portier Ferdigg vegn fora cuntra le palê mo se archirta. Al n un aprofiteia atira le asvelto Kanetscheider che sügha fora le portier y tira tla porta öta por le 0 a 1. N miú mete man n es le Mareo podú avei. Sambegn dal alta pert n té gol tai les iames y döta la partida deventa complicada. Le Mareo tira val ciantun senza ester prigorus. Dô da 19^ menüc tira la VB le pröm iade te porta. Ploner vegn da pert ite i tira te porta, le un Massa para alt la trata. Al 34ejim robat le un dla VB na puniziun dl diesc marô dan le atacant Ploner. Dô da 41^ de jüch tira Frontull na puniziun te porta dan la gran aria, Ferdigg robat da na pert fora. Dô da 53^ menüc tira le capitan dla VB na puniziun te porta da dan aria, ciafada por en fal propi sön vel da pert dl defensur dl Mareo. La trata röia dlungia pé de porta bass olache le portier la tegn sö. N menüt dedô sú t' aria dla VB tira Frontull alta fora. Al 57^ de jüch toma le 0 a 2. Al é na trata da na pert ite cuntra porta, Ferdigg robat cuntra mesa aria. Chilo danter deplú defensurs dla VB abina le curan le sú Ploner che á döt le temp de se oje y trá a mesa porta por le secundo gol. Al passa apena cater menüc che i marôi pó bele indô fá festa. Na trata de puniziun da en gran toch fora dla gran aria, trata da Mellauner röia te porta zentrala sura les mans dl un dla VB. Che ne fej te chesta ocajiun nia propi la miú figöra. Al vegn ince spó sostituí dal alenadú cun le dodesc Frenademetz. Sön na trata da ciantun peia te dui iadi le dodesc dla VB le curan alt. Al 92^ de jüch robat le secundo portier sön süa man ciampa na trata dl sedesc Castlunger da daimpró. Insció resta le resultat sön le 0 a 3 por le Mareo. Che à cherdú deplú tla deventa y é stá plú scuadra. La VB ne nia stada buna dá mete te ciamp la prestaziun dla partida da denant y süa situaziun resta prigorosa odun ince i trei infortüni a Vittur, Lorenzini y Matti Stampfer. Tl derby él sté da odei en jüch mesan, cun tröpes falades da trames les perts.
ACD Val Badia - SC Mareo: 0 - 3
Formaziun dla Val Badia: 1.Rene Ferdigg (dal 71^ Denis Frenademetz), 2.Dylan Liotto (dal 79^ Simon Erlacher) 3.Mattia Kastlunger, 4.Cristian Granruaz, 5.Samuel Vittur (dal 65^ Luca Bernardi), 6.Andrea Conrater, 7.Alexander Ploner (dal 69^ Florian Barbolini), 8.Gianluca Lorenzini (dal 74^ Matteo Ploner), 9.Roberto Del Negro, 10.Matthias Stampfer (capitan), 11.Marc Mayr.
Alenadú: Cristian Curti.
Goi dl deby: 2^ Robert Kanetscheider (Mareo), 57^ Pius Ploner (Mareo), 61^ Manuel Mellauner (Mareo).
Formaziun dl Mareo: 1.Nathan Massa, 2.Ivan Mutschlechner, 3.Andrea Mutschlechner, 4.Walter Kaneider (dal 77^ Hanspeter Rungger), 5.Gabriel Frenner (capitan), 6.Alessandro Ties, 7.Robert Kanetscheider, 8.Alan Erlacher (dal 57^ Thomas Castlunger), 9.Pius Ploner (dal 71^ Elmar Feichter), 10.Samuel Frontull (dal 65^ Robert Mutschlechner), 11.Manuel Mellauner (dal 82^ Samuel Winkler).
Alenadú: Marco Mutschlechner.
Proscimes partides: La Val Badia sügha bele en sabeda, ai 6 d' aurí 2019 da les 16:00 sön la plaza da Toblach cuntra l' Alta Val de Puster.
Le Mareo sügha en domenia, ai 7 d' aurí 2019 da les 16:00 sön la plaza "Ciamaur" a Al Plan cuntra le Valdaora.
3. Amateurliga 2023/2024