A.C.D. VAL BADIA - A.C.D. VAL BADIA - der Fußball im Gadertal

Domënia, 13. má 2018

Cun la deventa tl derby sorpassa la VB le Rina te tlassament y spera inant tla salveza, al é sté na partida da tröpes emoziuns y combatöda cina al ultim secunt

Da mete man ne él nia tan tröpa jent presenta al "Pradel" por ciarè le derby danter la terz ultima y la penultima de chesc rode de 2a. categoria. Tl secundo temp él rové cotan plú spetadus à dalerch. Al é sté en derby tröp combatú, cun val grou fal y endöt ot chertes gheles, cater porom. I ince rich de goi. Le ciamp "Pradel" ne é nia te de bunes condiziun dô le lunch invêr y al ne lascia nia pró le miú jüch. La scuadra de Curti é te en bun möment y se é trata sö de tröp.

Tl pröm temp sa soghè fora la VB le dopl vantaje merité, tl secundo ince dilan ai dui nüs dl Rina te ciamp dal pröm menüt é la formaziun de Craffonara indo rovada te partida ince dilan al gol tl pröm menüt. Da n' ultima tl recuper à le Rina ince albú la gran ocajiun dl 3 a 3, cun la fortüna in chesc iade da süa pert se tegn la VB la deventa y la speranza dla salveza de resté te secunda. Le Rina à ciamò dös ries partides, mo sciöche an à odú combatarai cina da n' ultima.
Al 4^ menüt él na trata de Fontanive rebatöda da en defensur dl Rina t'aria, le curan röia a Felder sú che tira alt. Do da 12^ de jüch fej Mellauner en fal dan aria sön Clara, la puniziun trata da Olex Stampfer röia sura le mür ite te porta. Le un Moling cun i pügns devieia da na pert fora. Al 13^ menüt él deplú trates di atacanc dla VB cuntra porta dl Rina, dô deplú rebatödes röia püch dan aria le palê a Clara che tira bass te porta. Le curan passa danter deplú sogadus ite dlungia pe de porta sön la man ciampa de Moling por le 1 a 0. Do da 25^ de jüch él na trata da vintecinch metri de D. Huber te porta, Ferdigg para la trata zentrala saurí. Al 35ejim passa Felder al capitan dla VB t' aria, chesc fej na bela rodada che röia de püch fora dlungia pé bass a man ciampa de Moling. Do da 38^ menüc röia prigorus t' aria D. Huber tiran, por dui iadi é bun Vittur da devié demez sües trates. Al 44^ de jüch röia da na pert ite t' aria Felder che se porta inant le palê saltan dui defensur dl Rina y lascian pié ia na trata cuntra le secundo pe de porta sot l' incrujada. Moling prô da la devié fora mo le curan arsesc te porta por le "corius" 2 a 0.
Al 46^ menüt röia apena t' aria D. Huber y vegn fat tomé da Vittur cun en fal. Atira scüra le arbiter Da Rin en önescmetri por le Rina, senza protestes da pert dla VB. D. Huber le tira sech bass sön la man derta dl un Ferdigg por le 2 a 1. Al 51ejim él na trata da dalunc de D. Ferdigg te porta, le un dla VB devieia te ciantun. Do da 53^ menüc vegn fat tomé Matti Stampfer t' aria da Winkler, le fal pê der evident mo le arbiter ne scüra nia. Protestes da pert dl VB. Al 56^ de jüch tla mesaciamp dl Rina fej Tschaffert en burt fal sön la ciaidla derta de Olex Stampfer, che mess gní condüt te ospedal, le sis dl Rina se la cava cun na cherta ghela, la tensciun vá söpert. I an alda ince scraian le arbiter. Al 61^ de jüch passa dan aria le diesc ladin a Fontanive che fej n bel "palonetto" sura Moling ite por le 3 a 1. Al 65^ menüt abina en defensur dl Rina le palê cun na man, le arbiter scüra en chesc iade en önescmetri por le VB. La responsabilité dla trata é dl capitan "Matti". La trata é sterscia y zentrala, Moling jora y devieia sura stangia fora te ciantun. Do da 68^ de jüch sön n aziun d' atach dl Rina do en sotisura dan porta röia na deviaziun a A. Ferdigg che tira bass te porta cuntra le secundo pe por le 3 a 2. Segn ciafa chi da Rina indô forza y coraje. Al 88^ menüt él na deviaziun de ce sön en cross de D. Huber, Ferdigg para alt la trata. Al 93^ menüt röia sú A. Ferdigg püch dan porta dla VB ala trata te porta, Vittur é bun püch dan la ligna da devié demez la trata che es podú porté al 3 a 3. Insciö é la devienta salvada. I tles ultimes dös partides jarada combatöda por odei chi che se mirita inant la 2°. Categoria. Döt le bun.

ACD Val Badia - USD Rina:  3 - 2

Formaziun dl Rina: 1.Michael Moling, 2.Manuel Mellauner (dal 85^ Michael Rungger), 3.Matthias Winkler, 4.Hanspeter Rungger, 5.Alfons Facchini (capitan)(dal 46^ Daniel Ferdigg), 6.Ivan Tschaffert, 7.Roman Gatterer (dal 46^ Andreas Ferdigg), 8.Tobias Costalunga, 9.Fidelis Ploner (dal 60^ Filip Ploner), 10.David Huber, 11.Marco Huber (dal 89^ Lorenz Rungger).

Alenadù: Georg Craffonara.

Formaziun dla Val Badia: 1.Rene Ferdigg, 2.Andrea Conrater, 3.Mattia Kastlunger, 4.Gianluca Lorenzini, 5.Florian Barbolini, 6.Samuel Vittur, 7.Alex Felder, 8.Alex Stampfer (dal 56^ Alexander Ploner), 9.Davide Fontanive, 10.Matthias Stampfer (capitan)(dal 70^ Cristian Granruaz), 11.Manuel Clara (dal 24^ Nicola Zuliani).

Alenadù: Cristian Curti.

Goi dl Derby: 1:0 13^ Manuel Clara (VB), 2-0 44^ Alex Felder (VB), 2:1 46^ David Huber (önescmetri)(Rina), 3:1 61^ Davide Fontanive (VB), 3:2 68^ Andreas Ferdigg (Rina).

Proscimes partides: en domenia ai 20 de mà 2018 tres da les 16:00 él sön le ciamp da Rina le derby cuntra le Mareo. La Val Badia süga sön la plaza da Valdaora cuntra le Valdaora.