Domënia, 12. novëmber 2017
Penultim post ala fin dl andata
Le Sest foss sté n aversar diret por la posiziun te classamënt y an ess podü ti rové do cun na devënta, mo endo n iade è na prestaziun nia da bravé che dá i punti ai aversars te na partida zënza gran emoziuns.
Tl pröm tëmp ne suzed nia tröp tl ciamp de jüch. Trames les scuadres ne röva nia te area aversaria y al passa 45 menüc cun en döt 2 trates da fora area dl Sest nia prigorusc che le portier ladin René blochëia y na trata dla Val Badia dlungia porta ia. Püces emoziuns te chësta partida por chi che è gnüs a ciaré pró.
Tl secondo tëmp ne cambia nia cis tröp la situaziun y la pröma dërta ocajiun dla partida porta atira ince al gol di aversars. Sön la cogora arlungiada de cé röva l’atacant Happacher ala trata che René para, mo sön la rebatöda mët l’aversar la cogora te porta por l’ 0 a 1. Al 32’ rovass quaji ciamó la Val Badia al gol dl per, mo l’arbiter ne le conzed nia. Sön na trata vëgn la cogora rebatöda da en defensur aversar sön la linea de porta. Le arbiter, che e ciamó a mezciamp, dij che la cogora ne á nia passé la linea mo al resta l’dübe che la cogora foss stata te porta. I ultimi menüc va endo inant sciöch le rest dla partida zënza plü degönes ocajiuns da gol. Do chësta pordöda resta la Val Badia sora al penultim post de classamënt ala fin dl andata. Al resta na sau ajia por en per de partides ola che i sogadus se á compliché enstësc la situaziun y lascé punc importanc sön trú. Sura l’invern è sëgn la scuadra che mëss ciafé la dërta motivaziun por se miglioré y porvé da trá fora döt ci che ai á tl rode de ritorno.
AFC Sexten - ACD Val Badia: 1 - 0
Formaziun: 1. René Ferdigg, 2. Matteo Ploner, 3. Florian Barbolini (dal 86’ Alexander Ploner), 4. Alex Stampfer, 5. Samuel Vittur, 6. Paolo Adami, 7. Nicola Zuliani (dal 67’ Gabriel Prada), 8. Alex Felder 9. Gianluca Lorenzini (dal 75’ Max Schrott), 10. Matthias Stampfer capitan, 11. Roberto Lorenzini (dal 62’ Mattia Kastlunger).
Alenadú: Cristian Curti