Sabda, 30. setëmber 2017
Buna prestaziun, mo pur punti ne bastel nia
Do da n per de partides cun prestaziuns nia da bravé, mëss la scuadra dla Val Badia cambié marcia. N ocajiun pur desmustré la vëia da se miglioré è la partida cuntra l'Gais fora de ciasa. Y da mët man la partida vëigun atira che la Val Badia á n gran druck da lascé fora.
La Val Badia mët man atira concentrada y conzed püch y nia ai aversars. Tla pröma mesora pel che la scuadra de ciasa ne pó ne fa nia cuntra i ladins che röva a deplü ocajiuns cun düc i atacanc y le portier aversar se stancia bindebo a tigní süa porta al sigü sön deplü cross dla Val Badia. Al 32’ menüt röva la pröma ocajiun pur l Gais che fej ince atira le pröm gol dla partida. Sön trata da ciantun deviëia l atacant aversar de cé te porta pur l 1 a 0 pur l’Gais. La Val Badia n è nia a öna de chësc svantaje nia merité y drüca ciamó deplü. Bel dan la fin dl pröm tëmp röva la Val Badia a 2 gran ocajiuns. Naota cun Felder che ne röva nia ala trata do n bel passaggio de Fontanive, y al 45’ ciamó cun Fontanive che sön contropiede rövel dassú dan le portier che è bun a paré la trata.
Tl secundo tëmp el ince indo la Val Badia che pro inant a chirí le per cun Felder y Fontanive che mët en gran difficolté la defenjiun aversara. Al 6’menüt dl secund tëmp röva Fontanive ala deviaziun de ce che röva püch dlungia porta ia. 4 menüc dedo röva Matthias ala trata da buna posiziun che ne röva nia te porta. Al 11’ menüt vëgn desgort dal ciamp n aversar pur dopla amoniziun, mo püch dedo ti vëgn ince mustré a Barbolini la cherta cöcena y les scuadres süga 10 cuntra 10. L’andamënt dla partida ne cambia nia y la Val Badia röva inant a ocajiuns. Na gran trata de Fontanive vëgn parada dal portier aversar cun na gran reaziun al 26’ menüt. Al 32’ menüt sciampa Heinrich te area y vëgn metü jö cun n contrast dübe che l’arbiter ess ince podü sciuré. Cun les ultimes forzes se salva le Gais le resultat fina ala fin dla partida y la Val Badia mëss sun jí sënza nianca en punt do na prestaziun che ess merité deplü. Insciö mëss se concentré la Val Badia ales proscimes partides cun ciamó plü convinziun pur tó a ciasa ince en per de punti.
FC Gais - ACD Val Badia: 1 - 0
Formaziun: 1. René Ferdigg, 2. Matteo Ploner, 3. Florian Barbolini, 4. Alex Stampfer, 5. Paolo Adami, 6. Andrea Conrater, 7. Heinrich Conrater (dal 87’ Davide Denicoló), 8. Alex Felder 9. Davide Fontanive, 10. Matthias Stampfer capitan, 11. Gabriel Prada (dal 67’ Andrea Pedevilla).
Alenadú: Cristian Curti.
Proscima partida: en domënia 08.10.2017 dales 15:30 söl ciamp dal sport "Pradel" cuntra la scuadra dl Dietenheim / Aufhofen.
3. Amateurliga 2023/2024