Domënia, 21. mà 2017
Gran devënta cuntra i pröms, la VB se tol na bela sodesfaziun y punć dër importanć por la salvëza
Jí à perde cuntra i ultimi te ćiasa y la domënia dedo à davagné cuntra i pröms ćinamai fora de ćiasa. Chësta é la situaziun atuala dla scuadra dla Val Badia. Por les tröpes asënzes à messú "Mister" Folchi se inventé na nöia defensciun, plazan ia de dô Pedevilla y Lorenzini. Na chierida che é jöda bun y à tigní bun le druch dl Feldthurns che à le miú atach dl campionat. Dí mëssun che i "campiuns" ne ti à scinché nia ai ladins, ai se à ćiafè na ghela por protestes y bëgn cinch por fai de jüch. La partida é stada sogada sot en gran ćialt dan da nia en gran publich.
Al é sté na partida plajora cun en bun ritm de jüch. Chi de ćiasa pëia ia cun druch y bele al 2^ menüt sön trata dl ot Nitz mëss devié sön süa man dërta Ferdigg da na pert fora. Do da 16^ de jüch passa Denicolo ite t' aria por Prada che alza le palé sura le portir ite sön le secundo pe por le gran bel gol dl 0 a 1. Al 32^ menüt por en fal dl capitan dla VB tira le Feldthurns na puniziun en dui metri dan aria. Le spezialist Hasler la tira dô mür ite, Ferdigg na nia dificultes i para ia por tera. Al 47ejim dl pröm tëmp passa Clara da na pert ite a Crazzolara che tira da daimpró te porta. Le un robat cun na gran reaziun. Al 54^ menüt do na bela aziun ćiafa Prada le curan da Pedevilla, süa trata bassa sön le secundo pé ne röia nia te porta. Do da 58^ de jüch sön na trata t' aria de Barbolini deviëia le portier sön la stangia de porta. Al 64^ menüt él na trata dl nü Dorfmann te porta che Ferdigg para sigú ia por tera. Do da 68^ de jüch röia la VB dlungia le secundo gol. Crazzolara sciampa sú da na pert ite t' aria y tira, le un Kerschbaumer robat la sterscia trata. Chiló protestëia chi de ćiasa por na posiziun de fora dl jüch sön la partënza dl diesc ladin. Al 73^ menüt él na trata diagonala dl Feldthurns che passa dan porta ca sënza ćiafè na deviaziun cuntra porta. Al 88ejim passa "Olex" Stampfer ite t' aria por "Matti" Stampfer che sú tira te porta. Cun le pe deviëia le un te ćiantun la gran ocajiun. Al 90^ menüt se lascia tomé le diesc Hasler t' aria ladina, le sigü arbiter ti mostra la ghela por simulaziun. Al é la secunda y ensciö vëgnel desgort. En pice aiüt por la VB da daidé la gran devënta sura le recuper de cater menüć fora. Do le scüre finâl é grana la ligrëza te ćiamp y de fora. Tl ultima partida de campionat messaran ćiamò fá en resultat ütl por podëi resté inant te 2a. categoria. La scuadra de Folchi à les cualites por le fá. Damaná é inće i fans à sostegní en gran numer la scuadra dla VB.
US Feldthurns - ACD Val Badia: 0 - 1
Formaziun dla Val Badia: 1.Rene Ferdigg, 2.Andrea Pedevilla, 3.Florian Barbolini, 4.Gianluca Lorenzini, 5.Simon Erlacher, 6.Andrea Conrater, 7.Manuel Clara (dal 46^ Armin Erlacher), 8.Alex Stampfer (capitan), 9.Gabriel Prada (dal 84^ Matthias Stampfer), 10.Miguel Crazzolara, 11.Davide Denicolo (dal 60^ Emanuel Dorigo).
Alenadú: Maurizio Folchi.
Gol por la Val Badia: Gabriel Prada (al 16^).
Proscima partida: en domënia ai 28 de mà dales 16:00 sön la plaza "Pradel" a San Martin de Tor cuntra le San Laurënz.
3. Amateurliga 2023/2024