Domënia, 14. mà 2017
Der na burta pordöda cuntra i ultimi, la posiziun te tlassament é valgamia prigorosa
Les partides cuntra i ultimi messun davagné, anfat à ci moda. Savon la situaziun te tlassament na gran ocajiun por i önesc de Folchi por se trá fora da les ultimes posiziuns. Dô la gran bela deventa cuntra le Raisca olache la scuadra à descmostré da se merité chesta categoria, ne podess nia sté te trú. Mo la formaziun dl Terenten é rovada a da lerch tröp motivada y ne à scinché gnanca en meter ala Val Badia. Cun tröp impegn y agresivité sportiva se ai porté demez la deventa acompagnada ince da en pü de fortüna. La VB ne nia stada buna da jí te ciamp cun la medema mentalité y agrsivité odöda cuntra le Raisca. Dô na partida che ara se à lascé sciampé fora dles mans, se ara compliché la situaziun por la salveza. Dös ocajiuns restel ciamò.
Al 6^ menüt tira A.Stampfer na puniziun alta sön chera che Lorenzini devieia te porta de ce. Le un dl Terenten devieia bel te ciantun. Do da 15^ de jüch tira indo "Olex" na puniziun en chesc iade devieia de ce Dorigo atocan le pe alt de porta. Al 21^ menüt sön na trata da ciantun devieia por le secundo iade Dorigo le curan sön le pe de porta y dedo en defensur te ciantun. Le önesc dla VB tira chesc bel ite t' aria olache al röia ala deviaziun al jore "Barbo" cun na trata alta dlungie le pe ite por le 1 a 0. Do da 28^ de jüch do val sburla t' aria röia le palé fora dl aria al ot Rastner che tira danter fora deplú sogadus bass atocan la pert bassa daite dl pe de porta por le 1 a 1. Al 42^ menüt tira "Matti" na bela puniziun te porta da bun vintecinch metri. Cun en gran jore sön süa man ciampa devieia le portier Feichter te ciantun.
Do da 46^ de jüch tira le nü Engl na bela puniziun te porta de Ferdigg, chesc robat la trata püch dan pe bass. Al 56ejim te bunamenter na posiziun de fora dl jüch röia le palé al diesc Oberhuber sú t' aria che cun na trata secia sön le secundo pe portl dant i terneri por 1 a 2. Ma dui menüc dedô toma le 2 a 2, Clara se la fej avarei cuntra deplú defensur y passa bel ite t' aria al capitan dla VB che tira en striscun bass sön le pe plú dalunc. Curiosité, sön la "bomba" se scerza la rei y le curan röia fora de porta, mo le arbiter te na buna posiziun veigha bun y asegna le gol. I deida dedô ince ala cuncé. Do da 64^ de jüch ciafa i terneri en önescmetri. Do deplú riviades nia jödes a bun fin da pert di ia dedô dla VB röia le curan al nü M.Engl che scabla cuntra scabla toma sön le contrast cun Vittur. Por le arbiter te na buna posiziun él atira en önescmetri. La trata bassa dl medemo sogadù vegn azicada sön süa man ciampa dal portier ladin, mo ara è der secia i röia te porta por le 2 a 3. La reaziun dla Val Badia ne porta nia al pêr che foss sté begn merité, odon ince i dui legns atochá tl pröm temp. Mo vigni partida à süa storia. Magari cuntra i "campiuns" dl Feldthurns pon se refá, cun la derta mentalité da örei davagné !!!
ACD Val Badia - SV Terenten: 2 - 3
Formaziun dla Val Badia: 1.Rene Ferdigg, 2.Heinrich Conrater (dal 53^ Andrea Pedevilla), 3.Florian Barbolini, 4.Samuel Vittur, 5.Andrea Conrater, 6.Paolo Adami, 7.Gianluca Lorenzini (dal 76^ Davide Denicolo), 8.Emanuel Dorigo, 9.Freddy Moling (dal 46^ Manuel Clara), 10.Matthias Stampfer (capitan), 11.Alex Stampfer.
Alenadú: Maurizio Folchi.
Goi por la Val Badia: Florian Barbolini al 21^ , Matthias Stampfer al 58^ .
Proscima partida: en domenia ai 21 de mà dales 16.00 sön la plaza da Feldthurns cuntra le Feldthurns.
3. Amateurliga 2023/2024