Domënia, 30. aurì 2017
Da n' ultima pon ester cuntënć cun en punt, la posiziun te tassamënt é prigorosa
Gnanca te chësta setima partida da d' aiscöda ne era jöda da davagné y se tó trëi punć por la salvëza. Un en punt é mí cho nia, da cho che la partida se ê metöda. Mo la posiziun te tlassamënt é da tomada jö y les partides vëgn tres de mancho. Propi cuntra le Sest essun podú fá en gran vare inant cuntra na scuadra da bate, sambëgn fajon na buna prestaziun cun jüch y gran vëia agonistica. Mo la prestaziun dla scuadra ladina ne nia stada da bravé. Impormó sön le 0 a 2 sa la formaziun descedé fora cumanan le jüch y arderzan le resultat. L' alenadú Folchi à indô mëssú chambie jö formaziun por deplü motifs de sogadus che mancia.
Le pröm tëmp é sté valgamia ecuilibré cun dös sores emoziuns. Al 20^ menüt sön en colp de ce da daimpró él na gran parada de Ferdigg. Do da 25^ de jüch salva en defensur dl Sest püch dan la ligna de porta en colp de ce de Vittur. Al 49^ menüt toma le 0 a 1 sön en colp de ce dl atacant dl Sest. Do da 60^ de jüch da na trata da ćiantun toma le 0 a 2 indo sön en colp de ce. Sön en trami i goi ne pó fá le portier dla VB nia. Al 68^ menüt cun le aiüt dl verdaporta dl Sest che ne abina nia le palé mët Pedevilla ite t' aria na passada por Moling che deviëia saurí te porta por le 1 a 2. Sëgn fej la VB druch y röia a val buna ocajiun. Al 85ejim toma le 2 a 2, sön na trata dl cumpagn röia ala deviaziun t' aria de ce te porta Barbolini. Na picia sodesfaziun por almancho en punt. Mo la strada dla salvëza vá söpert y vigni partida devënta fondamentala. Mo la scuadra mëss orëi deplú jon te ćiamp cun la dërta determinaziun por düć i nonanta mënüć.
ACD Val Badia - AFC Sexten: 2 - 2
Formaziun dla Val Badia: 1.Rene Ferdigg, 2.Heinrich Conrater (dal 80^ Fabian Dalpiano), 3.Florian Barbolini, 4.Paola Adami (dal 48^ Davide Denicolo), 5.Andrea Conrater, 6.Samuel Vittur, 7.Gianluca Lorenzini, 8.Alex Stampfer, 9.Freddy Moling, 10.Mathias Stampfer (capitan), 11.Andrea Pedevilla (dal 75^ Marc Mayr).
Alenadú: Maurizio Folchi.
Goi por la Val Badia: 68^ Freddy Moling, 85^ Florian Barbolini.
Proscima partida: en domënia ai 7 de ma dales 16.00 cuntra le Raiscia sön la plaza da Raiscia "B".