Sabda, 08. aurì 2017
Indô na partida da descmentié y penultim post te tlassamënt
Adöm cun le Vandoies anse i medemi punć te tlassamënt dan la partida. Al é na partida da sis punć, davagnan lascun i pustri trëi punć ia dedô y fej en bel gran vare söpert tl tlassamënt. Chëstes é les bunes speranzes dan la partida sön la plaza da Val Leria (Weitental). An spera inće te en pü de fortüna deplú cho tl ultima partida cuntra le Funes, rovada à mans ötes. Mo tosc dô le mëte man se complichëia inće chësta partida, che vëgn pordöda malamënter cuntra en aversâr tecnicamënter plú debl. Mo tröp plú motivé y agresif cho la scuadra ladina. En plú à la formanziun dla VB soghè por feter setanta menüć cun en sogadù en plú. Ne savon niancha te chësta partida da avëi en ütl tl jüch y tl resultat.
Bele do da 3^ menüć se porta dant le Vandoies. Na passada bassa t' aria röia al ascvelto Mirabella che superëia en velocité Adami y plaza na trata danter le pe de porta y le un Ferdigg da püć metri por le 1 a 0. Al 8^ de jüch do na puniziun por la VB röia sön na rebatöda le palé a "Matti" Stampfer che sú dan porta tira sö a les stëres. Do da 22^ menüć tira demez le curan le set Unterpertinger sön na remetöda contestada, chësc é bele diesc menüć denant gnú amonì por en burt fal sön "Matti". Secunda ghela y desgorta. Al 29^ de jüch tira sön rodada le asvelt Mirabella te porta, Ferdigg para te dui tëmps. Al 35ejim röia sú Schrott dan le portier dl Vandoies, süa trata da dampró vëgn rebatöda cun na gran reaziun da un Wieser. Do da 46^ menüć tira Crazzolara na puniziun da dan aria, le un para alt sigü. Al 52^ menüt tira indo le sterch nü Mirabella te porta ladina. Le verdaporta dla VB pert le palé sön la parada y Vittur tira fora te ćiantun püch dan porta salvan le resultat. Mo la formaziun de Folchi sbalia tröpes saurides passades che i pustri prô da sfruté cun de lungies passades cuntra le sú atacant Mirabella. Al 70^ menüt sön na lungia passada salta Prada cuntra porta superan inće le portier. Set, ot metri dan la gran aria vëgnel fat tomé dal trëi A.Putzer. Le arbiter ti sparagna la cherta chöcena don ma na ghela danter les tröpes protestes ladines. Do da 66^ de jüch tira le Vandoies na trata da ćiantun, H.Conrater alza de ce y le palé röia adös a Lorenzini püch dan porta ladina. Chësc se ćiafa ados sön le piet le curan che toma te porta por le 2 a 0. Chësc resultat ti dá tröpa forza a la scuadra de ćiasa che se prô sön vigni palé portan le resultat sura i nonanta menüć fora. Por la Val Badia acompagnada inće da nervosité na nia plú la forza inće cun un deplú da arjunje en resultat miú. La cuarta pordöda sön cater fej tomé la scuadra sora al penultim post te tlassamënt. La posiziun é ćialda. Le proscimo aversâr é le Mareo tl derby, la sora medejina é le davagné, sënza sará la situaziun bendebó complicada.
SV Vintl - ACD Val Badia: 2 - 0
Formaziun dla Val Badia: 1.Rene Ferdigg, 2.Heinrich Conrater (dal 80^ Davide Denicolo), 3.Florian Barbolini, 4.Samuel Vittur, 5.Andrea Conrater, 6.Paolo Adami, 7.Alex Stampfer, 8.Gianluca Lorenzini, 9.Max Schrott (dal 57^ Gabriel Prada), 10.Matthias Stampfer (capitan), 11.Miguel Crazzolara (dal 73^ Andrea Pedevilla).
Alenadú: Maurizio Folchi.
Proscima partida: en doman sabeda Santa ai 15 d' aurì dales 16.00 sön la plaza "Pradel" da San Martin de Tor por le derby ladin cuntra le Mareo.
3. Amateurliga 2023/2024