Sabda, 12. novëmber 2016
Na partida da les mille emoziuns, che se röia impormó al 94^ menüt.
Saù en pü antia por la VB por le resultat che ti é scampé fora dles mans deplú iadi.
Sön na plaza valgamia mola y dër mojela él gnü bele la sabeda sön le tert dl domisdé soghè la partida danter les scuadres cun i medemi punć te tlassamënt. Trames les formaziuns na nia propi i mius atać. Sce le pröm tëmp se rové sön le 0 a 0, mo cun la gran pert dl jüch fat dala formaziun de Folchi. L secundo é sté na dërta segra dl gol, bëgn ot ne anse odü. Al ê da agn che la sterscia defensciun dla VB ne se ćiafâ nia bëgn cater goi te na partida. La scuadra ladina à inće soghè por vintecinch menüć en diesc por la desgorta de Felder.
Tl pröm tëmp él na trata bassa de Dorigo al 26^ de jüch che röia en toch dlungia pé bass de porta fora sön la man ćiampa dl portier. Do da 34^ menüć sciampa sú sura mesaćiamp "Matti" do n intervënt à öt de n defesur cuntra porta. Le cater Hochgruber le tëgn y le fej tomé. Chësc se la cava cun na cherta ghela, le publich dla VB ores à gran usc n' ater corú. Al 44ejim röia na passada do en palé mal pordü dala VB al sú dan porta nü Berger che por fortüna ne atoca nia te porta.
Al 50^ menüt crossëia da jö da pe le diesc cuntra l' aria ladina, le önesc Wisthaler roda de plat te porta danter i defesnurs ite por le vantaje puster. Dui menüć plü tert roda de ce Dorigo ite a mesa aria pustra olache al röia da dô cá Matti Stampfer che splundra te porta por le 1 a 1. Do da 64^ de jüch passa dan aria cá Volgger por le compagn S.Huber che röia da na pert ite t' aria nia corí y tira bass sech te porta sön le pé plú dalunć por le 2 a 1. Cater menüć plü tert passa lunch a mesa jô Dorigo por le diesc dla VB che se destaca dai defensurs y röia sú dan le un Rastner che ne pó fà nia sön la secia trata tl piz bass. Sëgn stara 2 a 2. Al 69^ menüt fej a mesaćiamp Felder en grou fal sön le diesc Volgger, atira mostra le arbiter la cherta chöcena al set ladin. Dui menüć plü tert fej le capitan dla VB en toch sura mesaćiamp dl San Laorënz na gran, gran trata che arsesc sot la stangia de porta ite por le "gran gol" dl 2 a 3. Le resultat é sëgn rodé sön la per dla formaziun ladina. Al 77^ menüt él deplü trates ia y cá t' aria ladina, pordon le curan sön en contrast röia chësc a mez aria al sú sis F. Hochgruber che roda da püć metri te porta por le 3 a 3. Al 84^ de jüch sciampa cuntra porta Schrott che vëgn fat tomé dal cinch Kuen, inće chiló ma "ghela" por l puster. Mo al ne nia tëmp da protesté che al toma le nú vantaje dla VB. La puniziun trata da Crazzolara sot porta ćiafa na bela deviaziun de ce de Lorenzini che porta al 3 a 4. Grana la ligrëza por "Jan" al pröm gol ofiziâl y por i compagns. Al 90^ él Ferdigg che robat dös trates da ćiantun indolater salvan le vantaje. Do da 93^ menüt sön na picia sburla danter Adami y Vittur toma sciöche en sach dan jö le önesc Wisthaler. Mo le arbiter toma ite tla "scena" y cunzed en önescmetri dër da desené ai pustri. Le diesc B.Volgger le tira angolé alt sön la man ćiampa de Ferdigg por le 4 a 4. Ensciö se stlüj jö la pert da d' altonn cun en bun cuinto post te campionat. Al resta ćiamò le partida de "Copa Provinzia", ćiëra desot.
ASD St. Lorenzen - ACD Val Badia: 4 - 4
Formaziun dla Val Badia: 1.Rene Ferdigg, 2.Heinrich Conrater (dal 51^ Miguel Crazzolara), 3.Florian Barbolini, 4.Samuel Vittur, 5.Andrea Conrater, 6.Paolo Adami, 7.Alex Felder, 8.Emanuel Dorigo (dal 74^ Gianluca Lorenzini), 9.Gabriel Prada (dal 58^ Max Schrott), 10.Matthias Stampfer (capitan), 11.Alex Stampfer.
Alenadú: Maurizio Folchi.
Goi por la Val Badia: 52^, 68^ y 71^ Matthias Stampfer, 85^ Gianluca Lorenzini.
Proscima partida: in domënia ai 20 de novëmber dales 14.30 sön la plaza da Raiscia "B" la partida de retöda dl secundo rode de "Copa Provinzia 2016/17". La pröma partida se rova sön le 1 a 1.
3. Amateurliga 2023/2024