Domënia, 15. mà 2016
3 secunc por sbloché la partida
Te na domënia bindebo da vënt se prejënta l'ACD Val Badia sön le ciamp sintetich de Pichl cun la promoziun confermada y cun manco druch ados. Insciö a i sogadus ladins la poscibilité da se devertí te na partida che ai oro impó davagné. L'druch demanco á ince contribuí a na partida plajora cun ocajiuns da entrames les perts, suradöt tl secundo tëmp.
La partida mët man atira cun val che ne sozed nia gonot. Al sciüre dl'arbiter tira Matthi la cogura diretamënter te porta: gol!! L'tiro röva sot la traversa ite cun le portier n per de vari massa infora. Nianca düc capësc ci che al é sozedü y la Val Badia esultëia por l'gol do da 4 secunc de jüch can che le arbiter le convalidëia. 1 a 0 por la Val Badia.
Do l'gol ciafé insciö é le Gsies sciöche paralisé y ti pröms 30 menüc de jüch pó fa la Val Badia ci che ara ó te ciamp. Insciö röva i sogadus ladins a deplü ocajiuns. al 12' de jüc röva Prada sú dan le portier aversar, mo tira sura porta fora. En per de menüc dedo é Felder che mët na bela pala a Giovanni che da na buna posiziun se lascia ciamó anticipé da n defensur dan la trata te porta. Armin röva ince dlungia le gol sön puniziun al 27' menüt. La trata vëgn deviada dala bariera y röva dlungia porta ia de püch cun le portier che se a bel sciuré dal atra pert.
Le pröm sëgn de vita dl Gsies röva do da 31 menüc de jüch. Sön na trata da puniziun n é René nia bun a bloché la cogura y n atacant dl Gsies tira te porta por l'gol, che vëgn atira anulé por fuorigioco dl atacant. Le Gsies se porta inant y röva atira ciamó a na secunda ocajiun, ola che n cross devié dal atacant aversar röva dlungia porta ia. Do i per de menüc de druch dl Gsies röva spo la Val Badia al 2 a 0. Sön na trata dal ciantun de Matthias röva la pala bassa dlungia palo ite y tla mischia é le portier che la deviëia ciamó te porta por le gol che stlüj ince jö le pröm tëmp.
L'secundo tëmp mët man a pert invertides, nia ma tl ciamp, mo ince tl control dla partida. La Val Badia se lascia do fora cun i 2 goi de vantaje, y le Gsies pro da ne aprofité. Insciö röva i atacanc dla scuadra de ciasa bëgn 3 iadi susc cuntra René, mo ai sbaglia düc 3 i iadi. Nianca da crëi. Do le momënt de "palsa" röva ince i sogadus ladins indo te partida.Les scuadres é impü lunges y lascia tröpa lerch por ocajiuns da trames les perts. Cun en lancio lunch röva Felder al 33' menüt dl secundo tëmp ala trata da bona posiziun, mo la cogura va sura porta fora. 4 menüc plü tert röva spo indo Felder da na pert dl ciamp sö y crossëia bas por le subentré Pedevilla che sbürla la pala te porta por le 3 a 0. Pröm gol por le sogadú dla Juniores cun l'ACD Val Badia.
Ala fin röva le Gsiesertal ince al gol dla bandira. Indo röva n atacant sú cuntra René che pro a gní fora cun val indecisiun y se ciafa n pallonetto che röva te porta por le 3 a 1. Al fin röva ciamó Prada ince indo sú dan le portier aversar, mo sön la trata ne inquadrëiel nia la porta. Insciö se röva la partida cun en 3 a 1 por la Val Badia. Partida che ess podü se rové con deplü goi da trames les pert y n publich che á podü ciaré a na bela partida cun en gröm de aziuns.
La Val Badia se porta a 53 punc cun 12 punc dala secunda classificada che é sëgn le Sest.
SC Gsiesertal - ACD Val Badia: 1 - 3
Formaziun dla Val Badia: 1. René Ferdigg, 2. Simon Erlacher (dal 71' Heinrich Conrater), 3. Florian Barbolini, 4. Alex Stampfer (dal 80' Emanuel Dorigo), 5. Julian Bernardi, 6. Paolo Adami, 7. Gabriel Prada, 8. Alex Felder, 9. Matthias Stampfer (dal 62' Max Schrott), 10. Armin Erlacher (dal 65' Hannes Erlacher), 11.Giovanni Giaramita (dal 78' Andrea Pedevilla).
Alenadù: Luca Massa
Goi por la Val Badia: 1' y 44' Matthias Stampfer, 81' Andrea Pedevilla.
Proscima partida: en domënia dales 16:00 a San Martin söl ciamp dal sport "Pradel" cuntra le Dietenheim.
3. Amateurliga 2023/2024