Domënia, 10. aurì 2016
ACD Val Badia - SSV Raas: 1 - 1
Do la buna devënta cuntra le Sest, ó la Val Badia consolidé le pröm post y l'ocajiun cuntra la scuadra de Raas é buna pur se tigní i 3 punc te ciasa. Mo an sá che vigni scuadra se porvará dassën cuntra i pröms. Insciö era ince stada in chësta domënia. La Val Badia stënta da rové te partida y mostra só potenzial pormó tl secundo tëmp.
La partida mët man cun en bun cialt söl ciamp da La Ila. In chësc iade stënta la Val Badia a rové te partida y le Raas ne é nianca bun a costruí aziuns. Insciö el da aspeté fina al 19' menüt por odëi la pröma ocajiun che é por la Val Badia. N passaggio de Alex Felder porta Matthias te buna posiziun por le tiro che röva nia de tröp sura la stangia de porta fora. Do chësta ocajiun ne vëigun nia tröp, fina che do da 35 menüc de jüch é le alenadú Massa che mëss fa dui cambi te n iade. Armin y Alex Felder mëss lascé le ciamp, entrami infortuná. Insciö se cambiel dl döt l'mezciamp dla Val Badia. La partida va inant cun püces ocajiuns y püces idees da pert dla Val Badia.
Al 41'menüt toma spo l'gol dl svantaje dla Val Badia. La defenjiun ladina fej n gran cajin y lascia la pala al n.7 dl Raas che tira n bel tiro sot la traversa ite. Nia da fá por nosc portier y 1 a 0 por le Raas. Dopo se röva en pröm tëmp da desmuncé por la Val Badia.
Tl secundo tëmp röva te ciamp döta n atra Val Badia, zënza cambi mo cun atra marcia. La decisiun da orëi ciamó giré le resultat el düc che vëiga atira. Les ocajiuns da paregé por la Val Badia salta fora vigni trëi menüc. Al 49' tira Matthias da buna posiziun n bel tiro angolé che vëgn devié te angolo. al 51' röva Alex Stampfer sú cuntra l'portier mo l'tiro é zentral e vëgn paré. al 53' sön bel cross de Alex Stampfer pó Dorigo da buna posiziun devié te porta de cé cun le portier fora de posiziun, mo ne deviëia nia assá la pala por l'indirizé te porta. Al 54' röva indo le scatené Alex Stampfer sú cuntra le portier aversar. Mo indo é bun da paré le portier, in chësc iade te angolo. Sön la trata de ciantun röva spo Samuel ala deviaziun de cé de püch sura la traversa.
Le gol é tl aria, mo al ne ó nia gní. Insciö é le portier ciamó bun da fa na gran parada sön na bela punizione de Alex Stampfer. La Val Badia ne ti la zed nia y insciö röva ince l'tan aspté gol dl pareggio. Andrea Conrater fej n cross indirizé te porta che ciafa le cé de Dorigo che sfiorëia la pala tan da mené fora de tëmp le defensur che se ciafa ados la pala che spo röva te porta. 1 a 1 al 64' menüt de jüch. La Val Badia á ciamó forza da porvé da davagné la partida y röva ciamó a 2 de bones ocajiuns. L'ultima cun Matthias che ciafa n cross da Andrea, mo ne röva nia por püch ala deviaziun a dui vari dala porta.
Insciö se röva la partida söl 1 a 1 cun la Val Badia che mantëgn inant en gran vantaje de 9 punti sön la secunda tlassificada y se concentrëia bele sön la proscima partida fora de ciasa proscima sabeda ai 16.04 cuntra le St.Georgen Junior.
Formaziun dla Val Badia: 1.Rene Ferdigg, 2.Heinrich Conrater, 3.Andreas Conrater, 4.Alex Stampfer, 5.Samuel Vittur, 6.Paolo Adami, 7.Alex Felder (dal 35^ Gabriel Prada), 8.Emanuel Dorigo, 9.Manuel Clara, 10.Armin Erlacher (capitan)(dal 35^ Julian Bernardi), 11.Matthias Stampfer (dal 77^ Altin Alla).
Gol por la Val Badia: 64^ Emanuel Dorigo.
3. Amateurliga 2023/2024