Domënia, 30. märz 2014
N' bun punt sön en ćiamp olache al é dër rî da soghè
Pröma partida ofiziala dal rode da d'ainscöda, do la desdita dla domënia da denant por la tröpa nëi tomada sön la plaza da La Ila. Chësta é na domënia da en bel ćialt. Dl döt nia de bugn recorć ne à les scuadres dl San Martin, dl Alta y dla Val Badia sön chësta plaza. Bindebò picera olache al é valgamia rî da soghè, é chi de ćiasa à en gran vantaje. Bëgn nü di trëdesc punć se à le Dietenheim davagnè te ćiasa. La scuadra de Eppe Miribung se prejënta indo te ćiamp cun feter i medemi "aturs" dl palê cho da d'altonn.
Le resultat de paritè é jüst, tl pröm tëmp à druche deplù i pustri, mo tl secundo tëmp dilan inće al svelto y prigorus Prada à la VB albü les mius ocajiuns da gol. Do da 15^ menüć tira le ot puster na puniziun da dan le limit, le un ladin deviëa te ćiantun. Al 24^ de jüch se sënta jö dan aria sön en contrast da nia, "furbo" n' atacant dl Dietenheim. Indo le ot tira na bela puniziun che robat sön la stangia de porta cun J.Moling batù y vëgn dedo trata for a dal aria dai defensurs ladins. Chilò pon baiè de fortüna. Al 28^ menüt salta Clara deplü defensurs y passa ite a mesa aria por "Matti" Stampfer che da buna posiziun arjöma la trata te porta.
Do da 52^ de jüch tira le sis na bela puniziun da dan aria che "Julian" robat cun i pügns fora d'aria. Val atra puniziun dl Dietenheim ne röia nia tl spidl de porta. Al 58ejim do na bela aziun d'atach danter deplü sogadus dla VB röia ala trata Prada che röia alta sura porta fora. Tres Prada, al 66^ menüt pro la trata secia da vintecinch metri cuntra porta dl Dietenheim, le curan röia püch fora dan le pè bass de porta sön la man ćiampa dl portier. Al 83^ de jüch davagna en palê Freddy Moling sön na süa aziun che le passa a mesa aria al bel su Erlacher che tira dёr alt sura porta fora, gran ocajiun arjomada. Al 87ejim sön na trata lungia cuntra porta ladina é bun Vittur da anticipè le nü puster al ultim mömënt dan so portier. Tl recuper al 91^ menüt prô ćiamò en iade Prada la tratra da dan aria, chësta röia fora de püch dan pè bass a man ćiampa dl portier puster.
Goi ne él stè degügn, mo les ocajiuns à porté en pü de emoziouns te na partida che descëda fora le campionat do la palsa invernala. Les mius aodanzes y tröpa ligrëza cun la scuadra dl "ACD" ti fajunse a Kevin Granruaz che à esordì te chësta partida. A nüsc "tifosi" ti recordunse che le recuper cuntra le Steinhaus vëgn fat en mercui, ai 9 d` aurì 2014 dales ot da sëra sön la plaza da La Ila. Gnide tröć à se sostegnì.
SVD Dietenheim Aufhofen - ACD Val Badia: 0 - 0
Formaziun dla Val Badia: 1.Julian Moling, 2.Davide Moling, 3.Julian Bernardi, 4.Samuel Vittur, 5.Paolo Adami (capitan), 6.Manuel Clara (dal 65^ Kevin Granruaz), 7.Freddy Moling, 8.Alex Felder (dal 46^ Gabriel Prada), 9.Damian Pallestrong, 10.Armin Erlacher, 11.Matthias Stampfer.
Alenadù: Giuseppe "Eppe" Miribung.
Proscima partida: en domënia, ai 6 d' aurì 2014 sön la plaza da Feldthurns cuntra le ASV Feldthurns dales 16.00.