Domënia, 10. novëmber 2013
Trëi punć orüs y n gran vare söpert te tlassamënt
"Important él davagné de te partides cuntra scuadres tla feter medema situaziun te tlassamënt!", saurì dì. Mo propi cuntra scuadres plü lere debles se stënta la Val Badia a soghè bun y davagné. Les plü beles prestaziuns odödes chësc altonn é propi stades chëres cuntra les cater, cinch mius scuadres dl rode. Da en ultima é la devënta inće garatada, do na partida combatöda inćina da en ultima cun le Gsiersertal che oro à vigni moda se portè à ćiasa almanco en punt. La partida à metü man sot la nëi che à curì en pert la plaza da La Ila. Do che al à lasciè da "sblauchè" él gnü tosch la plaza indo vërda y plü luminus.
Cun chisc trëi dër importanć punć se tira sö la formaziun de Miribung al setimo post, ćiafan plü trancuilitè por le rode da d´aiscöda.
Al 24^ menüt tira le dui puster Hofmann na puniziun da bun vintecinch metri cuntra porta ladina, Panetta robat cun i pügns. Do da 43^ menüć tira Pallestrong na bela puniziun da fora dl aria, le un dl Gsiesertal é bun a val moda da deviè da na pert fora. En menüt plü tert do na bela aziun danter deplü sogadus röia püch dan porta Manuel Clara da na pert ite ala trata. Le portier Taschler robat de pé. Tla pert zentrala dl secundo tëmp fej la VB tröp druch y i pustri röia cotan sot presciun. Al 60^ él n diagonal bass de Pallestrong che röia fora do na bela passada de Pescollderung. Do da 62^ de jüch para le un di ghesć na trata zentrala de Pescollderung do n'aziun de M.Clara t'aria.
Al 70^ menüt tira fora d´aria ladina Bernardi sura la mesaćiamp, fora sön na pert prolungëia "Mastro" Pescollderung de će cuntra Pallestrong che superëia la defesciun pustra jo dasù cuntra porta. Le un Taschler ne vëgn nia fora à ti stlù la porta y Damian plazëia le palê sön le secundo pé por le 1 a 0. Grana la festa por le vantaje sëgn tröp mirité. La reaziun dl Gsiesertal é da odëi, mo cun gran impëgn controlëia la VB nia sënza dificultè le resultat. Al 83^ de jüch tira le "spezialist" Hofmann indo na puniziun da fora dl aria te porta, la trata zentrala vëgn alzada cun atenziun da Panetta sura stangia fora te ćiantun. I trëi punć é sëgn al sigü y düć po se gode la meritada palsa da d' invern.
Te chësta partida à soghè por le pröm iade Freddy Alfreider, ti aodun tröpa ligrëza y sodesfaziuns prò la scuadra dl palê dla VB.
ACD Val Badia - ASC Gsiesertal: 1 - 0
Formaziun dla Val Badia: 1.Alberto Panetta, 2.Florian Barbolini, 3.Andrea Conrater, 4.Samuel Vittur, 5.Julian Bernardi, 6.Manuel Clara, 7.Matthias Thaler, 8.Alex Felder (dal 87^ Julian Pizzinini), 9.Damian Pallestrong, 10.Armin Erlacher (capitan) (dal 83^ Freddy Alfreider), 11.Oskar Clara (dal 55^ Manuel Pescollderung).
Alenadù: Giuseppe "Eppe" Miribung.
Gol por la Val Badia: 70^ Damian Pallestrong.
Proscima partida: en domënia ai 23 de merz 2014 dales 15.00 sön la plaza da La Ila cuntra le Steinhaus.
3. Amateurliga 2023/2024