Domënia, 27. otober 2013
Rëis ötes
Degun gol, degüna emoziun, degüna devënta. La Val Badia mëss partì i punć cun l’ultima scuadra te tlassifica
Do le derby dl’edema da denant, che é gnü śoghé dër bun, à la Val Badia ospité te ćiasa la scuadra ultima te tlassifica, le Wiesen. Zënz’ater s’aspetân da condü a ćiasa trëi punć, mo insciö n’éra nia stada. An à odü na burta partida, de livel scialdi bas. Zënz’ater à la VB śoghé cun püćia motivaziun y inće te na manira n pü’ groia, ći che an ne po gnanca se pormëte cun l’ultima te tlassamënt. La delujiun é stada grana, deache an à odü che cun aversars cotan plü stersc àn fat de beles figöres. An spera che chësta sides stada na leziun por les proscimes partides.
La pröma ocajiun é al 11^ menüt, sön trata de Damian por Manuel Pescollderung. Chësc tira tl ćiantun bas, fora de püch. Al 13^ spo la pröma ocajiun por le Wiesen. L’atacant Hofer lascia pié ia na trata da fora d’area, che jora indere sura la traversa fora. Al 31^, sön trata de Damian, él Manuel Pescollderungg che röia ala trata dan le portier. Al prô n palonet, mo le palê jora alt. Al 35^ él indô Damian che abina n palê a mez ćiamp. Al se porta sö inant t’area y tira sön le secundo cone, mo inće en chësc iade va le palê fora de püch. Al 41^ él Manuel Pescollderungg che tira n palê por Manuel Clara. Chësc se ciafa na bela ocajiun sön le pé, mo le portier Mollica deviëia la cogora te ćiantun.
Dal mëteman dl 2. tëmp él döes novitês te ćiamp por la scuadra dla VB. Dui jogn di iuniors röia te ćiamp, por porvè da ”descedè” la scuadra ladina. Al 53^ ciafa i ladins na puniziun. David Bernardi tira cuntra l’area, olache al é n moscedoz de śogadus. Le palê i röia ados a Samuel Vittur, che s’arjigna da trà, mo le portier aversar é plü asvelt da se sciuré y deviëia tl ćiantun. Al 66^ garetel la maiù ocajiun por la VB. Damian se porta jö por la fascia y fej n bel cross amez. Prada röia dan porta cun le portier oramai batü, mo fala le contat cun le palê, che ti passa dlungia ia. Al 78^ romagn i ladins de diesc, do che manuel Clara fej n fal al limit dl’area y se ciafa la secunda ghela. L’atacant Hofer tira la puniziun che splundra sön la stangia de porta. Sön la rebatüda él Pescollderungg che pëia ia en cuntrapé y tira. Le portier para cun i pügns, y en chësc iade él Prada che röia sön la rebatüda y tira. La cogora vëgn deviada tl ćiantun. La partida se röia sön le 0 a 0.
ACD Val Badia - ASV Wiesen: 0 - 0
Formaziun dla Val Badia: 1. Alberto Panetta, 2. David Bernardi, 3. Julian Pizzinini (dal 46^ Gabriel Prada), 4. Samuel Vittur, 5. Alex Verginer, 6. Manuel Clara, 7. Matthias Thaler, 8. Alex Stampfer (dal 46^ Freddy Moling), 9. Manuel Pescollderungg, 10. Armin Erlacher - capitan, 11. Damian Pallestrong.
Alenadù: Giuseppe ”Eppe” Miribung.
Proscima partida: en domënia ai 3 de novëmber dales 14.30, ta Türesc cuntra le Türesc.
3. Amateurliga 2023/2024