Sabda, ai 15 de gügn 2013
Do le Rina, inće la Val Badia
Inće la scuadra dla Val Badia é tomada zoruch te terza categoria, mo al romagn ćiamò na ultima picia speranza da gnì trać fora.
Al ê i 27 de mà 2011 canche i podôn publiché t’La Usc l’articul dal titul ”Campiuns, campiuns, campiuns”. La scuadra dla Val Badia, che ê la gran novité dl campionat 2010/2011, ê stada buna da arjunje la promoziun tla secunda categoria, na partida dan la fin dl campionat. Śëgn, dui agn dedô, vëgnel baldi la pert rodosa dla medaia. Do che la scuadra da Rina à bele messü azetè la retrozesciun tla categoria plü bassa, é inće la scuadra dla Val Badia por le momënt tomada zoruch. I dijun por le momënt, ajache ara podess en teoria ćiamò sozede che la Val Badia mantëgnes so post, tres na combinaziun de avenimënć tles categories plü altes.
Les döes scuadres ladines de Rina y Val Badia à albü tles ultimes partides de campionat da ”se combate” l’öna cuntra l’atra, por mantignì le post de categoria. Ala fin dl campionat él stè le Rina che à trat ala cörta. Por n punt su é i maroi tomà jö de categoria diretamënter. La Val Badia - terzultima te tlassamënt - podô sperè inant da se tignì sö cun les partides de dezijiun, te n triangolar cun les scuadres da Mölten/Vöran y Laiun. Baldi n’àra nia orü ester.
Ai 12 de jügn à la Val Badia śoghé la pröma partida te ćiasa, cuntra la scuadra da Mölten/Vöran, partida che i aversars à davagné cun le resultat de 0 a 2. Bele püć dis dedô tocâra da śoghé la secunda partida cuntra Laiun, en chësc iade fora de ćiasa. Chilò à la Val Badia messü se dè sot cun le resultat pesoch de 4 a 0. Chësta ê ćina ilò la ”condana” finala de retrozesciun.
Mo sciöche dit indant, podéssera ćiamò n iade garatè, sce la Val Badia vëgn trata fora (ripescaggio). Co pa? I messun jì sö ćina tla seria D: ilò messassel sozede öna de chëstes döes cosses: 1) la scuadra dl Trënt (che é tomada jö) fej na fujiun cun le Fersina (che é romagnü tla seria D), o 2) le Mezzocorona vëgn trat fora por tó pert al campionat dla seria D. Te intrami i caji gnìssel un o dui posć lëdi tla categoria dessot y insciö inće tles categories amatoriales - tanco inće tla secunda categoria; insciö podess la Val Badia mantignì so post. La domanda da gnì trać fora à le ACD Val Badia bele menè ite.
Sce chësc ne garatass nia, arunse da d’altonn indô trëi scuadres dla Val Badia te terza categoria, che ô dì inće trëi derbys. Tla secunda podarà se mosorè por le momënt ma la scuadra dl Mareo, che à - sciöche i ùn scrit bele l’edema passada - arjunt la promoziun. Sce al sarà inće ilò n derby, odarunse y sperunse.