Dumënia, ai 5 de setëmber 2010
L’ aventöra é piada ia a pé zot
La scuadra nöia “Val Badia” à debutè cun n resultat de parité che sta cotan strent
Sön la plaza dl palê da Percha é piada ia l’aventöra dla Val Badia, scuadra nöia metüda adöm dal’ Alta Badia y dal San Martin de Tor. A arbitré chesta pröma partida él stè na arbitra jona, Barbara Pircher, che à cun desfortüna tut n per de decijiuns che à condizionè dassën le resultat a bëgn di pustri.
La formaziun nöia alenada dal espert Luca Massa à pité n bel jüch, les scuadres à ŝoghè fora deplü de bunes ocajiuns da gol. Propi chesc ti à falè por fá süa la partida cuntra na scuadra tröp manco tecnica y che à süa forza dl agonism.
Dan le meteman él gnü tignì n menüt de chit por recordè le desfortunè sugaù dl Percha Markus Oberhofer mort dan da püch te n inzident cun le tractor. Al 3^ menüt arjöma Pescollderung püch dan le pé de porta na saurida deviaziun. Al 4^ de jüch röia le nü Hainz cuntra le paradù Moling t´aria, chesc ti robat la trata de revers cuntra mesaciamp. L’ atacant puster salta adöm cun le verdaporta ladin y trami resta ia por tera. La peso ti toca a “Michael” che se à rot le poresc ciamp y toma fora por döta la pröma pert dl campionat. Plü de morveia restun canche la siora Pircher impede n fal sön le portier, scürera n önescmetri. Lazzeri segna cun na trata bassa sönla man ciampa dl portier Moling le 1 a 0.
Al 26^ menüt à la Val Badia na gran ocajiun por le pêr, Elmar Erlacher röia do na bela sogada t’ aria bel sù. Süa passada dan porta es ma bria da gnì deviada ite da Clara che arjöma na saurida ocajiun. Al 31^ de jüch tira Bacher na puniziun da fora dla gran aria do mür ite te porta. Moling devieia cun i pügns da na pert fora. Dui menüc dedo slalomeia Pescollderung ite t’ aria dl Percha y röia sú dan le portier Geiegger. Süa trata nia secia vegn parada. Do da 36^ de jüch röia n palê da na puniziun de Pescollderung t’aria al sù Clara che é bun da trá sura porta fora. Le gol no nia ester.
Al 47^ menüt gareta le 1 a 1, na bela aziun cun palê bass röia a Clara che da inant a Pescollderung chesc tira bass te porta tl piz plú da lunc por le pêr. Al 80^ menüt vegn contrasté cun n fal Alex Stampfer t’aria, nia scioré le önescmetri. Al 91^ menüt tira i ladins na puniziun cuntra aria, le curan vegn devié da n defensur cuntra Roland Alfreider che tira te porta por le 1 a 2. Sön protestes pustres anuleia la arbitra le gol por n´ fora dal jüch inesistent y che ti tol la deventa ala Val Badia.
SSV Percha - ACD Val Badia: 1 – 1
Formaziun ACD Val Badia: 1. Michael Moling, 2. Florian Barbolini, 3. Devis Vittur, 4. Simon Dapoz (capitan), 5. Samuel Vittur, 6. Andreas Chizzali, 7. Elmar Erlacher (dal 76^ Christian Alfreider), 8. Matthias Stampfer (dal 63^ Alex Stampfer), 9. Manuel Clara (dal 67^ Roland Alfreider), 10. Armin Erlacher, 11. Manuel Pescollderung.
Alenadù: Luca Massa.
Gol por la Val Badia: 47^ Manuel Pescollderung.
Proscima partida: En domënia, ai 12 de setëmber 2010 sön la plaza da San Martin de Tor ales 16.00 cuntra le Gossensass.
3. Amateurliga 2023/2024