Dumënia, ai 06 de mà 2012
Pordü inće te ćiasa cuntra le Falzes
La Val Badia fesc le jüch, mo la scuadra da Falzes se porta a ciasa i 3 punc. Por ci che an á adü dandadöt tl secundo tëmp fossel stè le per zënzater le resultat plü iüst.
La squadra dla Val Badia á pordü 2 partides indolater fora de ciasa. Cun na devënta o almanco n per, fossel stè meso da tigní ia dedô le Falzes tl tlassamënt. L’alenadú Massa á messé renunzié ai stersc sogadusc Pescollderung (scualifiché) y Stampfer Matti (tres ciamó infortunè). Assënzes chëstes bindebo de pëis por la scuadra dla Val Badia.
Tl mëtman á la Val Badia en valgönes ocajiuns por jí en vantaje. Al 6^ él Pallestrong che fesc na trata t’area, mo degügn n’è bugn da n’aprofité. Püch dedô él Dapunt che sön puniziun tira dlungia porta ia. Al 26^ ciafa Erlacher le coran en profondité da Pallestrong, le portier vëgn fora cina al limit dl’area por l’antizipé. Atira dedo él Pirilli dl Falzes, che ciafa la palê t’area y da buna posiziun tirel alt sura porta fora. Al 29^ toma spo le gol dl vantaje por le Falzes. Da na remetüda cun les mans t’area n’è i difensurs ladins nia bugn da abiné la coran che röia sön i pisc de Althuber che da cörta destanza n’a degöna dificolté a segné. Al 38^ él le Falzes cun Mutschlechner sön passada de Pirilli a falé na buna ocajiun por radoplé, mo al tira sura porta fora. Ala fin dl pröm tëmp él Dapunt che ti fesc na passada a Clara t’area, che superëia le portier y sëgna. Mo l’arbiter anulëia le gol y degügn capësc la gauja. Sön les protestes y spligaziuns damanades dai sogadusc á l’arbiter dit d’avëi odü na iama alta. Chësta dezijun falada dl arbiter á condizioné nia püch la partida.
Le secundo tëmp él la Val Badia cun Manuel che á les mius ocajiuns por le per, mo chëstes ne vëgn nia sfrutades dal atacant. Al 66^ él Clara che ciafa le coran t’area da Dapunt, mo le portier para. La Val Badia á porvé a vigni moda da arjunje le per, mo zënza avëi fortüna.
ACD Val Badia - ASD Pfalzen: 0 - 1
Formaziun Val Badia: 1) Vincenzo Amicone, 2) Matthias Thaler (dal 78^ Giovanni Trebo), 3) Julian Bernardi, 4) Simon Dapoz – capitan (dal 58^ Alex Stampfer), 5) Samuel Vittur, 6) Paolo Adami, 7) Elmar Erlacher (dal 67^ Devis Vittur), 8) Damian Pallestrong, 9) Manuel Clara, 10) Armin Erlacher, 11) Patrick Dapunt.
Alenadú: Luca Massa
Proscima partida: en domënia ai 13 de mà dales 16.00, fora de ćiasa cuntra le Lijun.
3. Amateurliga 2023/2024