Domënia, ai 29 de aurì 2012

Condaná de n' Eurogol al 90^ menüt, senza chesc se esun porté a ciasa en bun punt 

Te cater dis él gnü soghè dös partides y propi cuntra la secunda y terza forza dl campionat. La Val Badia ne nia rovada pró punc. La scuadra á ince indo tröpes asenzes por infortüne: Barbolini, Irsara, Matti Stampfer, Pallestrong, “Kaka” Vittur, M.Moling, O.Clara.

Implú cuntra Raiscia falâl por scualifica A.Erlacher y M.Clara. Te ciamp él jü deplü jogn dla Juniores che á descmostré impegn y de bunes cualites. Al è gnü soghè sön la der bela plaza da Raiscia, chera che ospiteia bele da tröc agn scuadres de seria “A”, cun na bela temperatöra cialdina. Atira él jü á edl le der der jon arbiter Repetto. Por la formaziun da Raiscia vara da tigní bot al Kiens por le secundo post, por la formaziun de Massa da chierí punc por mantigní le cuinto post. Al é stè na bela partida, nia da tröpes ocajiuns, la scuadra de A. Plankensteiner á atira fat druch por sbloché le resultat de 0 a 0. Pró düc trei i goi él sté discusciun, dan fora él sté fai y situaziuns nia odödes dal jon arbiter desigü cun pücia esperienza.
Al 5^ menüt sön na trata cuntra porta abina Adami le curan cun la man alta, al es podü gní dé n önescmetri. Le Raiscia protesteia, le arbiter na nia odü, fortüna ladina. Do da 7^ de jüch él n'aziun personala de Pescollderung da na pert jö, che sciapa ai defensurs y crosseia sön le secundo pé de porta. Ne se aspetan nia la trata röia sön le palê Erlacher nia arjigné i devieia dlungia porta fora. Al 24^ menüt röia do na bela aziun pustra le önesc Bierbauer bel sú te aria dla VB, le portier Massa vegn fora a d'incuntra. Le atacant nia en bun ecuiliber le salta mo cun na trata bassa ne atoche nia la porta. Do da 41^ de jüch sön na pert dan aria él n fal evident dl set Oberschmied sön Adami, le arbiter se porta le scure ala bocia por scuré, mo ne le fej nia. Oberschmied salta sú cuntra aria y passa ite a mez na trata che vegn mal abinada dal diesc Graber sú, che devieia debl te porta. Le palê röia bass sön la man ciampa de Massa te rei. N gol vizié. Sön les protestes y spligaziuns damanades dai acompagndus ladins vegn desgort G.Clement.
Al 47ejim dl pröm temp ciafa Erlacher na passada da Pescollderung bel sú dan aria, al ti vegn scuré ne posiziun fora dal
jüch der da dubité. Do da 73^ menüc toma le 1 a 1, na trata lungia röia a Pescollderung che cun iama alta abina le curan y sun sciampa cuntra aria pustra. I defensurs dl Raiscia stá en pü chic se aspetan le scüre dl arbiter sön le fal dl nü ladin. Le portier Wagger vegn fora de porta mo “Mastro” le salta cun abilité acompagnan le palê te porta oramai öta. Al 77^ de jüch él na bela aziun pustra che taia fora la defesciun y porta le set sú te aria ala trata secia. Massa jora sön süa man ciampa devian te ciantun. Al 90^ menüt ciafa le Raiscia n' ciantun che bunamenter ne foss niancha stè, la trata röia te piz dl aria a Benno Harrasser che tol le palê al jore le splundran sot l' incrujada de porta por en “Eurogol” che ti dà la deventa y la pordöda ala Val Badia. B. Harrasser é desigü un di mius sogadus de chesc grup de 2a. Categoria, i á te sües cualites ince chesc.
Te chescta partida á esordì i jogn Gabriel Prada y David Bernardi, de pert dl ACD Val Badia tröpes ligrezes y sodesfaziuns por le dagní te chesc bel sport dl palê.

US Reischach - ACD Val Badia: 2 - 1

Formaziun Val Badia: 1.Luca Massa, 2.Davide Moling (dal 72^ Gabriel Prada), 3.Julian Bernardi (dal 64^ Isaac Frenademetz), 4.Simon Dapoz (capitan), 5.Samuel Vittur, 6.Paolo Adami, 7.Elmar Erlacher, 8.Alex Stampfer (dal 83^ David Bernardi), 9.Manuel Pescollderung, 10.Patrick Dapunt, 11.Matthias Thaler.

Alenadù: Luca Massa.

Gol por la Val Badia: 73^ Manuel Pescollderung

Proscima partida:  en domenia, ai 6 de mà 2012 dales 16.00 sön la palza “Pradel” a San Martin cuntra le ASSV Falzes.