Dumënia, ai 13 de novëmber 2011
Tl ultima partida da d'altonn la sodesfaziun de avei batú i pröms
Al é sté da odei na gran bela partida danter dös de bunes scuadres. La setima posiziun te tlassament é ince plú da sté saurì.
N bel spetacol á podü odei i spetadus ladins y da Schabs sön le ciamp „Pradel“ tres te bunes condiziuns odon ince la sajun nia tan invernâla. Degöna desfarenzia ne an odü te ciamp danter i pröms dl Schabs y la Val Badia. Le asvelto jüch cun palês basc á metü deplú iadi n' dificulté le Schabs y la formaziun de Massa á albü deplú de bunes ocajiuns por le 2 a 0. Cun feter düc i sogadus titulârs é la scuadra dla Val Badia na bela realté te chesc campionat de 2a. categoria. Ma en pü da rencresce che te chesc bun moment le campionat é jü á piz.
La pröma gran ocajiun dl partida é al 5^ menüt sön i pîsc dl nü Frötscher. Chesc röia sú dan la gran aria, le portier ladin vegn fora cun decijiun ti stlujon le spidl dla porta. Süa trata deviada röia fora bassa sön le pé lunch y le Schabs tira ma for a en ciantun. Do da 14^ menüc él ince la pröma ghela por le sis Salcher por na tignida. Al 26ejimo sciampa “Matti” danter dui defensurs cuntra porta do avei recuperé n palê a mesaciamp. La trata é de püch alta. Do da 31^ de jüch él na trata de Thaler che le un Sagmeister tegn sö cun na parade alta. Al 36^ menüt sciampa jö y ite t'aria cun gran velocité Pescollderung che met á mez en pale d'or. De en nia röia tardis Sem Vittur y Thaler ala deviaziun dan porta, trami descmontiá dala defensciun dl Schabs. Mo le gol é tl aria. Al 40^ menüt fej presciun i atacanc ladins y n' defensur sbalia la passada che röia a Matti Stampfer che sciampa danter dui zentrai defensifs fora y röia sú t'aria n pü sön na pert. Al lascia pié ia na gran trata bassa tl piz lunch olache Sagmeister ne röia nia, 1 a 0. Da la gran ligreza saltel en gran toch sö por la rei por se ciafè le aplaus di fans.
Al 47^ de jüch tira le goleadù dla Val Badia na puniziun da dan aria che le portier robat fora de porta. Sön le curan röia Thaler bel sú püch dan porta y tira sech sön le pé de porta sön la man ciampa de Sagmeister. Dedo salva en defensur tiran fora te ciantun. Al 53ejim vegn fora de pügn Massa sön na trata da ciantun dl Schabs anticipan i atacanc. Do da 70^ menüc röia t'aria sú Clara che tira te porta, le un dl Schabs devieia demez de pé. Do na bela aziun röia al 72^ de jüch Pescollderung sú dan Sagmeister. Chesc fej n gran intervent devian fora de porta. N menüt dedô röia da na pert ite t' aria sú Frötscher dan Massa. Chesc devieia la trata da daimpró cun na iama y le curan röia dan pé de porta fora te ciantun. Al 80^ menüt él ciamò n bel diagonal de Pescollderung che ti sciampa t'aria ai stanc defensurs che röia for a de porta nia de tröp.
Ala fin él tröc aplausc por la bela deventa y por i aversârs che á pité na bela partida. Schabs resta adöm cun Raiscia al pröm post te tlassament, por la Val Badia en post á mesa tlassifica cun val pensîr por d'aiscöda da rové en pü plú en sö. N gran dilan á düc chi che á sostegní l'ACD Val Badia en chesc altonn y a se odei ala fin de merz 2012 por le derby cuntra le Rina. Recordun ince le sit dl “Acd” www.acdvalbadia.it che porta dotes les cronaches, tlassifiches y novites.
ACD Val Badia - ASV Schabs: 1 – 0
Formaziun dla Val Badia: 1.Luca Massa, 2.Julian Bernardi, 3.Devis Vittur, 4.Simon Dapoz (capitan), 5.Samuel Vittur, 6.Paolo Adami, 7.Matthias Thaler, 8.Andrea Irsara (dal 53^ Manuel Clara), 9.Matthias Stampfer (dal 82^ Alex Stampfer), 10.Armin Erlacher, 11.Manuel Pescollderung.
Alenadù: Luca Massa
Gol por la Val Badia: 40^ Matthias Stampfer
3. Amateurliga 2023/2024