Dumënia, ai 06 de novëmber 2011
Deventa tlera, che es podü ester ciamò plü torona sce i atacanc ladins ne scuras nia al vent tan de gran ocajiuns
Prestaziun ejemplara dla defensciun, che é segn danter les mius dl campionat
Por ester i pröms de november é les condiziuns por soghè al palê les mius sides cun les temperatöres cho cun i ciamps. Da atira pon odei na gran lominosité sön la zona dal sport “Pradel”, al é gnü taié demez tröc de gran legns che fajô tröpa ambria ala plaza. Chesta ciafarà suradöt da d'aiscöda canche ara vá debojegn che la nei sun vais, tröp plú soredl.
La partida é stada tres tles mans dla Val Badia che á fat odei n bel jüch y sogan saurì senza nervosité. I pustri ne á nia podü fá tröp por evité la secia pordöda, limitada dassen dal só gran portier Christian Rainer. Düc i goi dla Val Badia é stá signà dô der de beles aziun de jüch cun deplü passades cun palê bass. Al 14^ menüt prô la deviaziun te porta ladina le atacant Mairhofer cun na man, odü dal arbiter se ciafel la “ghela”. Ma “Maradonna” á podü sgnè cun la man. Do da 23^ de jüch röia te aria n cross da la man ciampa, le nü Sinner bel sú devieia bel de ce te porta. „Massa“ che defen indo la porta de süa scuadra jora y alza cun la man sura stangia fora te ciantun. Al 28^ menüt tira Matti Stampfer te porta, le un robat le curan cun n gran intervent. Erlacher abina le palê y ti le passa a Irsara che röia dan porta y tira. Al é ince na picera deviaziun da pert de n defensur y chesc röia te porta sön la man ciampa dl portier. 1 a 0.
Do da 32^ de jüch él n pass t'aria de Pescollderung por le nü ladin, chesc supereia en velocité le verdaporta y dedo vegn sciuré sotisura dal cinch J.Rainer. Al vegn conzedü n' önescmetri, amonì le cinch y al é ince val protesta. “Matti” tira le “önesc” sech à mesa alteza sön la man ciampa dl portier por le 2 a 0.
Al 47^ de jüch toma t'aria sön en contrast cun Adami le nú atacant Dalla Santa, ai minâ che al foss en önescmetri. Al 59^ menüt röia sú Stampfer dan le portier puster che ti robat la trata da dampró. Do da 70^ de jüch sön na passada de Thaler röia sú dan le un dl Dietenheim Erlacher, al ti tira adoss. Al 76^ menüt él Alex Stampfer che passa a Pescollderung che tira te porta, le portier devieia te ciantun. Do da 87^ de jüc röia ince la sodesfaziun dl gol por „Pescho“ le önesc dla Val Badia. Sön na rebatöda abinel le curan te süa mesaciamp, al salta sú cuntra porta dl Dietenheim. “Manuel” aspeta che al vegnes fora le sterch portier y spó tire tl piz lunch por le merité 3 a 0. N menüt plü tert á ince na gran ocajiun Clara por só pröm gol te 2a. categoria. Al röia sú dan le portier y tira te porta, chesc robat de pé la trata. Ara resta sön le 3 a 0.
Tla pröscima partida röia al “Pradel” i pröms dl Schabs, la Val Badia ciararà da tí fa la vita, partida döra. Sce le jüch é chel dles ultimes partides, spó él na sigurté che ara vais bun.
ACD Val Badia – SVD Dietenheim/Aufhofen: 3 – 0
Formaziun dla Val Badia: 1.Luca Massa, 2.Julian Bernardi, 3.Devis Vittur (dal 75^ Alex Stampfer), 4.Simon Dapoz (capitan), 5.Samuel Vittur, 6.Paolo Adami, 7.Matthias Thaler, 8.Andrea Irsara (dal 84^ Florian Barbolini), 9.Matthias Stampfer (dal 65^ Manuel Clara), 10.Armin Erlacher, 11.Manuel Pescollderung.
Alenadù: Luca Massa.
Goi por la Val Badia: 28^ Andrea Irsara, 32^ Matthias Stampfer sön önescmetri, 87^ Manuel Pescollderung.
Proscima partida: en domenia, ai 13 de november 2011 dales 14.30 sön la plaza “Pradel” a San Martin de Tor cuntra le ASV Schabs.
3. Amateurliga 2023/2024