Dumënia, ai 16 de otober 2011
Ultimi te tlassament, de revers ince da Falzes á mans ötes, cun la cuarta pordöda te gofa
Do set partides de campionat de 2a. categoria é la scuadra dla Val Badia ultima te tlassament cun mâ cinch punc adöm cun le Niederdorf. Olá épa restada la bela y sterscia scuadra dal' ann passè ??? Se damana tröc.
Ince te chesta partida é deplü coses jödes stortes. Sön le vantajê puster se á le portier Massa conzedü na "papera", Dapunt apena varí á indô subí en infortüne y i dui legns de porta atochá es podü ester dui goi. Der mal sigü é ince sté le arbiter Carli che á ince scialdé sö i nerfs di sogadus ladins y di atri.
Al é sté soghè te n domisdé bel cialt. Le anunziadù dla plaza dl palê á lit dant la formaziun dl "Alta Badia", le inom "Acd Val Badia" ne bunamenter nia ciamò der arsí fora en puster. Interessant él ince che dui sogadus dla Val Badia süga titulars pró la scuadra dl Falzes. Andrea Palfrader da La Plí y Luca Pescollderungg da La Ila.
Al 18^ menüt pian ia da na posiziun de foradljüch nia scurada röia Trebo bel sú dan le portier t'aria. Al aspeta en pü massa da trá y la trata ti vegn rebatöda dal un dl Falzes che ti á intratan stüt le spidl de porta. Do da 25^ de jüch röia da na pert ite t'aria Thaler che tira te porta, en defensur devieia le curan che otoca le pé bass de porta sön la man ciampa dl portier. Al 37^ menüt tira L.Pescollderungg na puniziun te porta, Massa la para mo le curan ti sciampa fora dles mans arsin püch dan porta. Chiló ne él degügn defensurs ladins y le sú ot A. Althuber tira te porta por le 1 a 0. "Luca" se tol sö la resposabilité dla "papera".
Al 48ejim a mesa-ciamp él n fal de Pirilli sön Dapunt che á la peso y mess gní condüt te ospedal. N burt bot ala ciaidla ciampa. Do da 50^ menüc él na bela aziun ladina cun na gran trata da dan i sedesc metri de Pescollderung a mesa alteza che porta al gran gol. Mo sön la trata veiga le arbiter na man dl önesc dla Val Badia, nia orüda, le gol vegn onulé. Al 64^ menüt él na bela trata dl set Klapfer da dan aria che röia sön la rei dô la stangia de porta. Al 67^ de jüch röia le 2 a 0, L. Pescollderungg ti sciampa ite t'aria a Bernardi y cun na trata sön le pé lunch segnel. Dui menüc plú tert él n contrast danter Adami y le set Klapfer dan porta, le palê rebatü vegn pié da Massa. Le arbiter cunzed n'önescmetri der ala svelta por en fâl der dübe. Ince tl pröm temp él sté metü jö Pescollderung t'aria senza conseguenzes. La trata dl sis B. Holzer á mesa alteza ciafa la gran resporta de Massa che devieia da na pert fora se fajon pordené le "fal" da denant. Do da 94^ de jüch vegn atoché le secundo iade le pé de porta sön na deviaziun de Trebo da na trata da ciantun, le gol no onfô nia rové.
Segn esun ultimi. Tröc e´stá i tifosi a Falzes, che ne se á nia fat aldí cun sü cors sciöche an é ausá da l'ann passé. La scuadra adorass der segn le sostegn "acustich" tl moment de dificulté.
ASD Pfalzen - ACD Val Badia: 2 - 0
Formaziun dla Val Badia: 1.Luca Massa, 2.Davide Moling (dal 70^ Florian Barbolini), 3.Devis Vittur, 4.Simon Dapoz (capitan), 5.Julian Bernardi, 6.Paolo Adami, 7.Matthias Thaler, 8.Matthias Stampfer, 9.Giuvani Trebo, 10.Patrick Dapunt (dal 48^ Manuel Clara), 11.Manuel Pescollderung.
Alenadù: Luca Massa
Proscima partida: en domenia, ai 23 d'otober 2011 dales 15.30 sön la plaza "Pradel" a San Martin de Tor cuntra le ASV Lijun.
3. Amateurliga 2023/2024